Azərbaycan, Rusiya və Ermənistan XİN rəhbərlərinin görüşü haqqında

Görüşdən sonra səsləndirilən bəyanatda isə 2016-cı ilin aprel və iyun aylarında Vyana və Sankt-Peterburqda əldə olunmuş razılaşmaların yerinə yetirilməsinin vacibliyi vurğulanıb.

Rusiya, Azərbaycan və Ermənistan XİN rəhbərlərinin görüşlərini politoloqlar Şahin Cəfərli və Elxan Şahinoğlu "Ölkə.Az"-a şərh edib.

Rusiya, Azərbaycan və Ermənistan XİN rəhbərlərinin Moskva görüşü barədə danışan Şahin Cəfərli bildirdi ki, artıq Azərbaycan və Ermənistan arasındakı danışıqlarda münaqişənin həlli məsələsi yox, atəşkəsə riayət olunması ilə bağlı problemlərin həlli müzakirə olunur:

"Halbuki ötən ilin aprelindən sonra gözləntilər var idi ki, Azərbaycanın çox qısamüddətli də olsa güc göstərməsi və çox minimal da olsa uğur qazanması danışıqlara pozitiv təsir edəcək, həll prosesi bizim maraqlarımız əvvəlkindən daha artıq nəzərə alınmaqla, sürətlənəcək. Lakin bu baş vermədi. Əksinə, vasitəçilər atəşkəs pozuntularının qarşısının alınması üçün təmas xəttində xüsusi mexanizm qurulması məsələsini önə çıxardılar. Aprel döyüşlərindən sonra keçirilən bütün görüşlərdə əsas müzakirə mövzusu məhz bu olub və hətta Vyana, Sankt-Peterburq görüşlərində bu barədə razılıq əldə edildiyi açıqlanıb".

Mövcud durumun, sözügedən mexanizmin qurulması Azərbaycanın maraqlarına tamamilə ziddir və işğalçını rahatlatmağa yönəlib deyən politoloq əlavə olaraq bildirdi ki, vəziyyəti çətinləşdirən əsas amil budur ki, heç bir beynəlxalq məsələdə anlaşa bilməyən Qərb və Rusiya bizim problemimizə münasibətdə ortaq mövqedədir:

"Qərb Qarabağ məsələsini faktiki olaraq Rusiyaya həvalə edib və qarışmır. Ərdoğan Türkiyəsi isə bizim regionda Rusiyanın maraqları əleyhinə ciddi addımlar atacaq cəsarətə sahib deyil.

Yaranmış vəziyyət Azərbaycanın manevr imkanlarını aradan qaldırır və bizi Rusiyaya məhkum edir. Hakimiyyətin məşhur balans siyasətinin Qarabağ münaqişəsinin həlli baxımından hər hansı effekt vermədiyi də ortadadır".

Elxan Şahinoğlu Rusiya, Azərbaycan və Ermənistan XİN rəhbərlərinin bu günki görüşünü şərh edərək qeyd etdi ki, gözlənildiyi kimi Rusiya, Azərbaycan və Ermənistan xarici işlər nazirlərinin Moskva görüşü də nəticəsiz qaldı:

"Görüşün yekunlarıyla bağlı yayılan və heç bir məna ifadə etməyən 3-4 cümləlik bəyanatda əsas fikir bundan ibarətdir: “Tərəflər Vyana və Sankt-Peterburq sammitlərində əldə edilmiş razılaşmaların həyata keçirilməsinin zəruri olduğunu vurğulayıblar”.

Məgər prezidentlərin 2016-ci ildə Vyana və Sankt-Peterburq görüşlərində hansısa razılıq əldə olunub? Yeganə şifahi razılıq o olub ki, danışıqlar davam etdirilsin və atəşkəsə riayət olunsun. Bunun nəyi razılıqdır ki? Əksinə bu bizim maraqlara zidd olan status-kvonun uzanması deməkdir".

Moskva görüşünün nə anlama gəldiyini isə politoloq belə şərh etdi:

"Moskvadakı görüşün bir mənası var idi: Kreml Azərbaycanın müharibəyə başlamayacağına əmin olmaq istəyirdi. Buna əmin oldumu – bunu gələcək aylar göstərəcək".

Səxavət Məmməd
Ölkə.Az