Ölkə.Az-a kütləvi hücum

Dünən səhər saat 9-dan etibarən ölkənin son vaxtlar ən çox ziyarət edilən xəbər saytlarından biri olan "Ölkə.Az"-a haker hücumları başlayıb.

“Ölkə.Az” saytının texniki heyəti bu hücumun indiyədək olan ən kütləvi hücum olduğunu qeyd edirlər.

Texniki heyət hücumun DDOs tipli olduğunu, hostların əksəriyyətinin gizli olduğunu, bəzilərinin isə Türkiyə, Pakistan və Hindistandan olduğunu qeyd edirlər. Ümumiyyətlə, sayta 2000 IP-dən hücum olunur. Buna görə də saytımızın yerləşdiyi server bir müddət sayta girişi və onun idarə olunduğu administrativ strukturu bağlayıb. Sayta xidmət edən mütəxəssislər bildirirlər ki, bu hücumlar nəticəsində saytın dağıdılması mümkün olmayacaq, amma fəaliyyətdə qısamüddətli fasilələr ola bilər.

Fikrimizcə, bu sayaq hücumlar diletant adamların işi deyil və "Ölkə.Az" saytının gündəmə gətidiyi məlum restoranda erməni musiqisinin səslənməsi ilə bağlı ola bilər.

"Ölkə.Az"-ın fəaliyyətinə əngəl yaradılması sifarişi haradan gələ bilər?

“Ölkə.Az” saytının baş redaktoru Qafqaz Ömərovun fikrincə, hələlik onların şübhələndiyi yeganə şübhəli Fətullah Gülən şəbəkəsidir. “Saytımızda son günlər "Mado" restoranında erməni diasporasının fəallarından Şer Sarkisyanın mahnısının səsləndirilməsini saytımızın işıqlandırması və ölkə KİV-nin dəstəyi, millət vəkilləri, QAT və bir çox qurumun hadisəni qınaması məlum şəbəkəyə mənsub olan bu restoranla aramızda problemlər yaradıb. Onlar, barələrində çıxan materialları müxtəlif yollarla təkzib etməyə, hətta bizə çamur atmağa çalışırlar - gah sosial şəbəkələrdə öz biabırçılıqlarına haqq qazandırmaq istəyirlər, gah da sayt rəhbərliyinə müxtəlif vasitəçilər vasitəsilə zənglər edirlər, gah da məhkəməylə hədələyirlər və s. Hiss olunur ki, ciddi təşviş içindədirlər və nəyin bahasına olur-olsun, ünvanlarına səslənən tənqidləri neytrallaşdırmaq istəyirlər. Bu baxımdan "Mado" restoranının "Ölkə.Az" saytına hücum təşkil etdirməsi tam gözləniləndir. Hətta biz bunu proqnozlaşdırırdıq”.

Saytın texniki heyətindən isə bildiriblər ki, növbəti mərhələ hücumların qarşısını almaq üçün addımların atılmasına həsr olunacaq. Əsas təhlükə saytın dağıdılıb, arxivin də itməsidir: "Hər sayta hücum olur. Bu, həvəskar hakerlər tərəfindən də baş verir, professionallar tərəfindən də. Amma bu dəfə hücum fasiləsiz baş verir. Ona görə də xaricdəki serverimizi dayandırmaq qərarına gəlmişik."

Saytımızda yaranmış bu texniki qüsurla bağlı oxucularımızdan üzr istəyirik.

Səxavət Məmməd
Ölkə.Az