QAT-dan Milli Məclisə müraciət

Qarabağ Azadlıq Təşkilatının azərbacanlı girovlar Dilqəm Əsgərov və Şahbaz Quliyevin taleyi ilə bağlı keçirdiyi 1 həftəlik aclıq aksiyası bu gün dayandırıldı.

QAT İdarə heyəti bu barədə qərar qəbul edib. Qərar qəbul olunarkən aksiya iştirakçılarının səhhətində yaranmış gərginlik, həkimlərin təkid etməsi, həmçinin aksiyanın kifayət qədər rezonans doğurması nəzərə alınıb. Yeddi gün ərzində aksiyaya geniş dəstək verilib, girovların məsələsi kifayət qədər ictimailəşdirilib, hakimiyyətin və beynəlxalq təşkilatların fəaliyyətində müəyyən irəliləyişlər hiss olunub.

Qarabağ Azadlıq Təşkilatı aksiya iştirakçılaına, aksiyaya dəstək verənlərə bir daha təşəkkürünü bildirir və xüsusi olaraq vurğulayır ki, girovların azadlığa çıxması üçün öz imkanları daxilində işlərini davam etdirəcək, mümkün təsir forma və vasitələrindən davamlı şəkildə istifadə edəcəkdir.QAT aclıq aksiyasına informasiya dəstəyi verən KİV-lərə minnətdarlığını bildirir.

QAT rəhbərliyi aclıq aksiyasının iştirakçıları ilə birlikdə bu gün 20 noyabr terror aktı qurbanlarının məzarlarını da ziyarət edib, məzarların üzərinə gül dəstələri oyub, ruhlarına dualar oxuyublar. QAT 20 noyabr terror aktı nəticəsində helikopterdə həlak olmuş insanlarla bağlı Milli Məclisə müraciət edib. Müraciətdə göstərilir: Bu gün 20 noyabr terror aktının qurbanlarının faciəli şəkildə həlak olmalarının növbəti ildönümüdür. Bu terror aktı nəticəsində Azərbaycanın dövlət adamları, ictimai xadimləri, mətbuat nümayəndələri, beynəlxalq vasitəçilər helikopterdə vəhşicəsinə qətlə yetiriliblər. Bu hadisə Azərbaycana çox ağır bir zərbə idi. Təəssüf ki, bu hadisəyə hələlik kifayət qədər diqqət yetirilməyib, beynəlxalq təşkilatların nəzərinə çatdırılmayıb. Bu hadisə Ermənistanın dövlət səviyyəsində terrorla məşğul olduğunu, terroru dövlət siyasətinə çevirdiyini əyani şəkildə sübut edib. Qarabağ Azadlıq Təşkilatı bütün bunları nəzərə alaraq təklif edir:
1. 20 noyabr terror aktının qurbanlarının xatirəsinin əbədiləşdirilməsi üçün geniş tədbirlər həyata keçirilsin, onların hər birinə şəhid statusu verilsin.
2. 20 noyabr tarixinin “ Terror qurbanları günü” elan olunması ilə bağlı qanun qəbul edilsin.
3. Ermənistanın Azərbaycana qarşı törətdiyi 20 noyabr və digər terror aktları ilə bağlı faktları təqdim etməklə beynəlxalq təşkilatlar qarşısında Ermənistanın terrorçu dövlət kimi tanınması üçün məsələ qaldırılsın.

 

Ölkə.Az