"Özümüzdə olan nöqsanların aradan qaldırlmasına çalışmalıyıq"

Bununla bağlı Azərbaycan Respublikasının Baş Prokurorluğu, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidməti bəyanat yayıb.

Bəyanatda deyilir: "Ermənistan Silahlı Qüvvələrinin kəşfiyyat və xüsusi xidmət orqanları tərəfindən Azərbaycan Respublikası Müdafiə Nazirliyinin Tərtər rayonu istiqamətində yerləşən bölmələrinə və yaşayış məntəqələrimizə qarşı genişmiqyaslı təxribat fəaliyyətinin həyata keçirilməsinin planlaşdırıldığı barədə əldə edilmiş məlumat əsasında aparılmış tədbirlər nəticəsində müəyyən olunub ki, xalqına, vətəninə və dövlətinə xəyanət yolunu tutan iradəsi zəif, vətəndaşlıq ruhunu və vətəninə bağlılığını itirmiş bir qrup hərbi qulluqçular və digər mülki şəxslər Azərbaycan Respublikasının suverenliyi, ərazi toxunulmazlığı, dövlət təhlükəsizliyi və müdafiə qabiliyyətinin zərərinə olaraq, düşmən kəşfiyyatçıları ilə məxfi əməkdaşlığa cəlb edilərək, müxtəlif vaxtlarda maddi maraqları naminə hərbi sirr təşkil edən məlumatları düşmən tərəfinə ötürüblər".

Baş verən bu hadisə ilə bağlı hərbi ekspert Tərlan Eyvazov "Ölkə.Az"a danışıb:

"Müvafiq orqanların verdiyi qısa bəyanatdan görünür ki, istintaq gedir. İstintaqın gedişinə mane olmamaq üçün verilən məlumatla kifayətlənmliyik. Bundan artığına ümid edə bilmərik.

Əslində belə bir aksiyaların keçiriləcəyi gözlənilən idi. Azərbaycan respubilkasının təhlükəsizlik doktrinasının 36-cı bəndində deyilir ki, dinc dövrdə görülən tədbirlər, ölkənin müdafiə qabiliyyətini möhkəmləndirmək, mümkün təhdidlərin qarşısını almaq və potensial düşməni Azərbaycan respubilkasına qarşı hər hansı əməllərdən, təcavüzkarlıqdan çəkindirmək məqsədi daşıyır.

Azərbaycan respubilkasına ən əsas təhdid Ermənistandan qaynaqlanır. Bu gün baş verənlərə təəccüblənməməliyik. Baş verənlərin əsas səbəbini arxayınçılıqda görürəm. SSRİ dövründən başlayaraq ermənilər Azərbaycanda terror aktları törədib. Hər iki dövlətin müstəqil olmasından sonra isə ermənilərin törətdikləri terror aktları yüksələn xəttlə inkişaf edib. Ermənistan Azərbaycan torpaqlarının 20%-ni işğal etdi. Bundan sonra 1994-cü ildə erməni xüsusi xidmət orqanları Bakı metropolitenində terror aktları törətdi".

Hərbi ekspert aprel döyüşlərinə diqqət çəkərək bildirdi ki, ordumuzun uğurlu əməliyyatlarından sonra mən və digər həmkarlarım ermənilərin bunun qisasını alacağı ilə bağlı xəbərdarlıq etdik:

"O zaman dəfələrlə bildirdik ki, hiyləgər ermənilər bu uğursuzluqlarının cavabını verməyə çalışacaq. Bu qisası açıq döyüşdə edə bilməsə də, digər vasitələrlə Azərbaycana qarşı aksiyalar törətməyə nail olacaqlar. Buna görə ehtiyatlı olmalıyıq. Əhalimiz şübhəli nə isə gördükdə müvafiq orqanlarımızla əməkdaşlıq etməlidir. Bu hər bir Azərbaycan vətəndaşının vətəndaşlıq borcudur.

Güc strukturlarımızın verdiyi qısa bəyanatdan görürük ki, nəinki hərbçilərimiz, eyni zamanda yerli əhali də agentura şəbəkəsinə cəlb edilib. İki dövlət arasında müharibə gedirsə, agentura şəbəkəsinin fəaliyyət göstərməsi tamamilə təbiidir. Biz bunu bütün müharibələrdə görürük. Hər iki tərəf bundan bəhrələnməyə çalışır. Ötən ilin aprel ayından sonra agenturaların güclü iş görəcəyini düşünürdük. Çünki Ermənistan tərəfi elə düşünürdü ki, Azərbaycan tərəfi tamamilə zəifdir. Qoyulan status-kvo ilə razılaşıb. Bu hadisələrdən sonra həm Ermənistan dövləti, həm də diasporası bütün sahələrdə olduğu kimi, bu sahədə də fəallaşıb və agentura işi üçün çox böyük vəsaitlər ayırmaqdadır.

Peşəkar baxımdan agentin ələ alınması üçün 3 əsas vasitə mövcuddur - idealogiya, şantaj və pulla ələ almaqdır. Baş verən son hadisədə ideologiyadan söhbət belə gedə bilməz. Burada maddiyyat və şantajdan söhbət gedə bilər. Belə ki, dinc əhali və hərbçiləri öz tərəfinə çəkib, şirnikləndirib, onlar arasında alver baş tutduqdan sonra şantaj məsələsi dövriyyəyə girib. Bizi təəccübləndirən əsas məsələ agentura təkcə cəbhə bölgəsində yox, güc orqanlarının verdiyi bəyanatdan göründüyü kimi daha irəli gedərək, yəni, onlar cəbhə boyu şəbəkə qurub bu şəbəkədən hətta mərkəzi şəhərlərimizdə təxribat planlayıblar. Bununla ölkəmizin beynəlxalq imicinə xələl gətirməyi qarşılarına məqsəd qoyublar.

Bu təxribat Azərbaycanın son illərdə ciddi beynəlxalq tədbirlərə ev sahibliyini, artan nüfuzunu hədəf götürüb.

Biz aprel döyüşlərinin eyforiyasından qurtulmalı, gurultulu təqdimatlardan çəkinməli, özümüzdə olan nöqsanların aradan qaldırılmasına çalışmalıyıq. Aprel döyüşlərindən sonra cəbhə bölgəsində olarkən gördüyümüz mənfi halları, nöqsanları rəhbərliyə çatdırmışdıq. Təbii ki, bunlar haqqında mətbuata danışmadıq. Hazırda olanlar ancaq Tərtər istiqamətini göstərir, bunu isə ona görə üzə çıxardılar ki, Tərtər əhalisi həmisə düşmənə qarşı dirənişi ilə, qəhrəmanlağı ilə fərqlənib və bu baş verənlər təbii ki, o bölgənin əhalisi arasinda çox təəccüb doğurur. Məsələ ondadır ki, baş verən bu hadisə əslində bütün cəbhə boyu ərazilərimizi əhatə edir".

Vətəndaşlarımızın da bu sahələrdə fəaliyətinə toxunan Tərlan Eyvazov qeyd etdi ki, gördüyümüz hər nöqsanı xüsusi xidmət orqanlarına çatdırmalıyıq:

"Bəzən bunu "işverən kimi" qəbul edirlər. Əgər dövlətin təhdidinə yönələn bir hal varsa burada nə müxalifət, nə iqtidar, nə də digər məsələlər düşünülməlidir. Bu gün DTX keçmiş MTN-dən qalan nöqsanların aradan qaldırılması ilə məşğuldur. Baş verənlərin səbəblərini araşdırıb aradan qaldırmalıyıq. Elnur Hüseynzadə erməni tərəfinə keçən zaman silkələnib, bu məsələlərin üstünə getməli idik.

Çox təəssüflər olsun ki, insanlarda tez varlanmaq və tamahkarlıq bu hadisələrin baş verməsinə gətirib çıxardır".

Qeyd edək ki, aparılmış təxirəsalınmaz istintaq-əməliyyat tədbirləri nəticəsində düşmənin kəşfiyyat və xüsusi xidmət orqanlarının Bakı şəhərində ictimai yerlərdə həyata keçirməyi planlaşdırdıqları təxribat və terror fəaliyyətinin qarşısı alınıb, məxfi əməkdaşlığa cəlb olunmuş bir qrup hərbi qulluqçu və mülki şəxslər cinayət məsuliyyətinə cəlb edilərək barələrində həbs qətimkan tədbiri seçilib.

Səxavət Məmməd
Ölkə.Az