Türkiyədə rusiyalı turistlər qəzaya düşdü

“Ölkə.Az” xəbər verir ki, hadisə Antalya şəhərində qeydə alınıb. Antalyadakı istirahət mərkəzlərindən birində ana və oğul motosikletlə gəzərkən 20 metrlik dərəyə yıxılıblar.

Qəza mayın 10-da axşam saatlarında qeydə alınıb. 47 yaşlı Oksana Popova və onun oğlu 11 yaşlı Danıl Popov hadisə nəticəsində ağır yaralanıblar.
Yaralılar ətrafda olan insanların çağırdığı xilasedicilər tərəfindən dərədən çıxarılıb. Onları xəstəxanaya yerləşdiriblər. Həkimlərin dediyinə görə, hər iki yaralının vəziyyəti ağırdır.

Qeyd edək ki, son günlər Türkiyədə turizm obyektlərində rusiyalı turistlərin qəzaya uğraması halları çoxalıb. Bir çox hadisələr turistlərin ölümü ilə nəticələnib.

Hadisələrdən biri may ayının 5-də baş verib. Antalya şəhərində yerləşən turizm mərkəzində istirahət edən Anastasiya Zaxarova paraşütlə tullanarkən həyatını itirib. Ötən ay da buna bənzər hadisə olub. Həmin vaxt 26 yaşlı rusiyalı turist paraşütdən tullanarkən ölüb.

Ziya Səccad
Ölkə.Az