"Heydər Əliyevin ləğv etdiyi ölüm hökmünü Qüdrət Həsənquliyev kimdir ki, bərpa etsin?

Qüdrət Həsənquliyev fikrini Tərtərdə baş verən son hadisələrlə əsaslandırıb və qeyd edib ki, Azərbaycan müharibə vəziyyətində olduğu üçün dövlətə xəyanət və digər ağır cinayətlər törətmiş şəxslərə qarşı ölüm cəzası tətbiq edilə bilər. Buna beynəlxalq konvensiyalar və qanunvericilik də imkan verir.

BAXCP sədrinin səsləndirdiyi fikrə politoloq Zərdüşt Əlizadə "Ölkə.Az"-da münasibət bildirib:

"Cəmiyyətin ciddi müşküllərindən danışmağa cürət etməyən adamlar hansısa mücərrəd məsələlərdən danışmağa başlayırlar. Azərbaycanda ölüm hökmünün bərpa edilməsinə reallıqda heç nə imkan vermir. Bunun üçün zərurət yoxdur. Azərbaycan Avropa Şurasına üzv olanda öhdəlik götürüb ki, ölüm hökmünü ləğv etsin. Ölüm hökmünü Heydər Əliyev ləğv edib. Qüdrət Həsənquliyev kimdir ki, Heydər Əliyevin ləğv etdiyi ölüm hökmünü bərpa etsin? Bu sadəcə Qüdrət Həsənquliyevin gündəmdə qalmaq üçün səsləndirdiyi bir fikirdir.

Azərbaycanda köklü müşküllər var. Qüdrət Həsənquliyev iqtisadi durğunluqdan, korrupsiyadan, səviyyəsiz məhkəmələrdən danışsa, ona bir söz demək olmaz.

Ölüm hökmünün bərpasına nə ehtiyac var, nə zərurət, nə də imkan var.

Səxavət Məmməd
Ölkə.Az