Türkiyə ordusundan PKK-ya ağır zərbə

Türkiyədə terror əleyhinə əməliyyatlar davam edir.

“Ölkə.Az” xəbər verir ki, mayın 16-da keçirilən əməliyyat zamanı Türkiyənin cənub-şərqində PKK-nın ən böyük silah-sursat anbarı aşkarlanıb.

Türkiyə Silahlı Qüvvətlərinin Şırnak vilayətinin İncəbel dağllarında keçirdiyi əməliyyatda PKK terrorçularının gizləndiyi 48 mağara aşkarlanıb. Keçirilən əməliyyat zamanı terrorçuların gizləndiyi mağaralarda çoxlu silah-sursat, ərzaq və geyim tapılıb.

Mağaralarda 450 müxtəlif tipli silah, 258956 sursat, 5 ton partlayıcı maddə, 50 tondan artıq ərzaq, 10 tondan çox dərman, çoxlu sayda geyim və digər əşyalar olub.

Qeyd edək ki, İncəbel dağlarında 19 apreldən bəri PKK terror təşkilatına qarşı əməliyyatlar keçirilir. Davam edən əməliyyatda Türkiyə Silahlı Qüvvətlərinə jandarma qüvvələri də dəstək verirlər. Bu əməliyyat son illər ərzində Şırnakda terror təşkilatına vurulan ən böyük zərbə olub. Mağaraların daxili hissələrinə çatmaq və onları darmadağın edib istifadəyə yararsız vəziyyətə gətirmək üçün İncebel Dağları ətəklərindən zirvəsinə doğru bulozer, ekskavator və digər tezniki vasitələrlə işlərin aparılması davam etdirilir. “Şəhid jandarma minbaşı Ahmet Karaman-2” adlı əməliyyatın gedişində ələ keçirilən silah-sursatın içərisində yalnız kalaşnikov avtomatlarının sayı 337 ədəddir.

Sonuncu əməliyyat bu ilin mayın 8-də də keçirilib. Əməliyyat zamanı Türkiyənin cənub-şərqində, İncebel dağlarında 25 mağarada PKK-nın ən böyük silah-sursat anbarı aşkarlanıb. Anbarlardan pulemyot, raketatan, qumbara və çoxlu miqdarda sursat bu əməliyyatda aşkarlanıb.

Ziya Səccad
Ölkə.Az