Bakı-2017: Güləş və stolüstü tennis yarışları başlayır

"Ölkə.Az" Trend-ə istinadən xəbər verir ki, bu gün atletika yarışları davam edəcək. Kişilər 200, 400 və 800 m məsafəyə qaçış, 110 m sədlərlə qaçış, lövhə atma və üç təkanla tullanma, qadın idmançılar isə 200, 800 m məsafəyə qaçış, 3000 m maneələrlə qaçış, nüvə itələmə və şüvüllə tullanma üzrə yarışlarda qüvvələrini sınayacaqlar.

Boksçuların mübarizəsində finalçılar müəyyənləşəcək. Azərbaycanı yarımfinal görüşlərində Tayfur Əliyev (56 kq), Cavid Çələbiyev (60 kq), Tamerlan Abdullayev (69 kq), Kamran Şahsuvarlı (75 kq), Rauf Rəhimov (81 kq), Teymur Məmmədov (91 kq) və Məhəmmədrəsul Məcidov (+91 kq) təmsil edəcəklər.

Atıcılıqda son yarış günündə qarışıq komandaların 10 m pnevmatik tapança ilə atəş açma və dairəvi stend yarışlarında qaliblər müəyyənləşəcək.

Üzgüçülük turnirində kişilər 50 m batterflay (delfin), 100 m sərbəst, 4X100m kompleks estafet, qadınlar isə 50 və 400 m sərbəst, 100 m batterflay, 200 m brass və 4X100m kompleks estafet üsulu ilə üzmədə yarışacaqlar.

Mayın 17-də stolüstü tennis yarışlarına start veriləcək.

Taekvandoçuların mübarizəsi davam edəcək. Azərbaycanı qadınların yarışında Patimat Abakarova (49 kq), Fəridə Əzizova (67 kq), kişilərin mübarizəsində isə Ayxan Tağızadə (68 kq) və Olimpiya çempionumuz Radik İsayev (+87 kq) təmsil edəcək.

Həmçinin tennis oyunları davam edəcək.

Su polosu millimiz qrupda Səudiyyə Ərəbistanı ilə qarşılaşacaq.

Oyunların 10-cu günündə yunan-Roma güləşçiləri tatami üzərinə çıxacaqlar. İdmançılarımızdan Murad Məmmədov (59 kq), Rəsul Çunayev (71 kq), Rafiq Hüseynov (80 kq) və Orxan Nuriyev (98 kq) medallar uğrunda mübarizə aparacaqlar.