"Etika - Media Məktəbi" layihəsi çərçivəsində Mingəçevir şəhərində 2 gündə 40 gəncə təlim keçirildi
“Ölkə.Az” xəbər verir ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2017-ci il qrant müsabiqəsində maliyyələşdirdiyi, Gənclərin Sağlam İnkişafı İctimai Birliyinin təşkilatçı qismində iştirak etdiyi “Etika-Media Məktəbi” layihəsinin növbəti dayanacağı Mingəçevir şəhəri olmuşdur.
Təlimlər may ayının 19 və 20-də Mingəçevir Gənclər Evində 40 nəfərə yaxın gənc tələbənin iştirakı ilə baş tutub. Tədbirdə bir sıra şəhər rəsmiləri, tələbə və müəllim kollektivi iştirak etmişdir.
Güclü media cəmiyyətdə maarifləndirmə işini irəliyə aparır və dayanıqlı inkişafı sürətləndirir. Medianın güclü olması jurnalistlərin öz işlərində peşəkar bacarıqlara və ümumi standartlara nə dərəcədə yiyələnmələrindən asılıdır.
Təlimlərin gedişi zamanı qeyd olunmuşdur ki, məqsəd Azərbaycan mediasında yeni düşüncəyə malik və həmçinin dövlətin maraqlarını hər şeydən üstün tutan gənc jurnalist ordusunun yaranmasına dəstək olmaqdır. Azərbaycanın informasiya kommunikasiya texnologiyaları sahəsindəki uğurları ölkədə internet istifadəçilərinin sayını artırmışdır. Jurnalistikanın əsas məqsədi vətəndaşların cəmiyyətdə fəaliyyət göstərə bilmələri üçün onları dəqiq və etibarlı məlumatlarla təmin etməkdir.
Təlimin sonunda layihə iştirakçıları sertifikatlar ilə təltif edilmişlər.
“Etika-Media Məktəbi” layihəsinin növbəti təlimləri Yevlax şəhərlərində baş tutacaqdır.
Ölkə.Az
