Tramp Roma Papası ilə razılığa gəldi

“Ölkə.Az” xəbər verir ki, görüş zamanı Amerika lideri ilə papa əsasən terrorla mübarizə və qlobal ərzaq problemini müzakirə ediblər. Bu barədə Ağ Evin mətbuat xidmətindən məlumat verilib. Verilən məlumata görə, söhbət zamanı Trampla papa arasında razılaşma olub.

“Tramp Roma Papası I Fransisklə danışıq zamanı beynəlxaql terrorla mübarizədə müqəddəs atanın xeyir-duasını istəyib. Tramp həmçinin bu mübarizədə kilsənin də böyük rol oynaya biləcəyini deyib. Sonda beynəlxaql terrorla mübarizədə dini liderlə Tramp razılığa gəliblər”, - deyə məlumatda bildirilib.

Məlmatda həmçinin qeyd edilib ki, Tramp Roma Papası I Fransiskə söz verib ki, qlobal ərzaq probleminin həllində yardımçı olacaq. Tramp ABŞ-ın aclıq baş alıb gedən ölkələrə 300 milyon dollardan artıq yardım göstərəcəyi barədə göstəriş verəcəyini deyib. Bu ölkələr sırasına Yəmən, Sudan, Somali və Nigeriya birinci yerdə durur.

Qeyd edək ki, Tramp mayın 20-də Səudiyyə Ərəbistanına ilk dəfə olaraq səfər edib. Mayın 22-də isə Donald Tramp rəhbər kimi ilk dəfə olaraq İsrailə səfər edib. İsrail və Fələstinə səfəri başa çatdıqdan sonra D.Tramp İtaliya yol düşüb.

Ziya Səccad
Ölkə.Az