Azərbaycan və Türkiyə lavaş ətrafında birləşir

Görüşdən sonra mətbuat nümayəndələrinə danışan Ömər Çelik Azərbaycanla çox əhəmiyyətli layihələri həyata keçirəcəyini qeyd edib

Ölkə.Az Anadolu agentliyinə istinadən xəbər veirir ki, Türkiyənin Mədəniyyət və Turizm naziri Ömər Çelik Bakıda Türkiyə Mədəniyyəti Günlərinin açılış mərasiminə qatılmaq və görüşlər aparmaq üçün gəldiyi Azərbaycanda həmkarı Əbülfəs Qarayevlə görüşüb. İki ölkə, lavaş başda olmaqla, bir çox məhsullarını və mədəni irsini UNESCO-nun qeyri-maddi mədəni irs siyahısına salmaq üçün birgə müraciət etməyə hazırlaşır.

Nazirliyin təşkil etdiyi görüşdə danışan Çelik Azərbaycan və Türkiyənin ortaq tarixə malik olduğunu vurğulayaraq iki ölkənin gələcəyə baxışının da ortaq olduğunu ifadə edib.

Azərbaycanlı həmkarı ilə razılaşmadıqları heç bir mövzunun olmadığını və hər görüşdə razılaşdıqları mövzuların daha da artdığını ifadə edən Çelik, iki qardaş ölkə arasında iqtisadi və siyasi sahələrdə yüksək inkişafın əldə edildiyini və mədəni əlaqələrin də artdığını bildirib.

Görüşdən sonra mətbuat nümayəndələrinə danışan Ömər Çelik Azərbaycanla çox əhəmiyyətli layihələri həyata keçirəcəyini qeyd edib:

"Lavaş başda olmaqla, ölkələrimizin bir çox məhsullarını və mədəni irsini UNESCO-nun qeyri-maddi mədəni irs siyahısına salmaq üçün ortaq şəkildə müraciət edəcəyik. Koroğlu mövzusunda da birgə iş görürük. Biri mədəniyyət, digəri isə turizm sahəsində davamlı olaraq çalışan iki komitə quracağıq. Sözügedən komitələr altı aydan bir nazir müavinlərinin rəhbərliyi altında bir araya gələcəklər. Biz də ildə bir dəfə olmaqla görüşərək onların gördükləri işləri nəzərdən keçirəcəyik. Tarixi İpək Yolu və Dədə Qorqudun tarixi irsinin reallaşdırılması mövzusunda ortaq layihələr həyata keçirəcəyik",- deyə, nazir bildirib.

Ömər Çelik hər iki ölkədə keçirilən mədəniyyət günlərinin qardaş xalqların bir-birinin mədəniyyətini daha yaxından öyrənməsi baxımından önəmli olduğunu vurğulayıb.

Rəşid Mustafazadə

Ölkə.Az