İŞİD-in edam etdiyi insanların basdırıldığı kütləvi məzarlıq tapıldı

İraqın Mosul şəhərində İŞİD terrorçuları tərəfindən öldürülən dinc əhalinin basdırıldığı kütləvi məzarlıq aşkar edilib.

“Ölkə.Az” xəbər verir ki, İraq ordusunun keçirdiyi əməliyyat nəticəsində terrorçular Mosul şəhərinin Aş-Şifa rayonundan çıxarılıb. Rayonda qətlə yetirilən dinc əhalinin basdırıldığı kütləvi məzarlıq tapılıb. Məzarlıqda bir-birinin üstündə basdırılan 60-dan çox meyid olub. Öldürülənlərin çoxu qadın və uşaqlardır.

Qeyd edək ki, hazırda Mosulun qərbində İŞİD terrorçuları 300 minə yaxın dinc əhalini nəzarətdə saxlayır. Terrorçular insanlara imkan vermirlər ki, şəhəri tərk etsinlər. Gizlincə şəhərdən qaçmaq istəyənlər isə öldürülür.

2016-cı ilin oktyabr ayından Mosulda İraq ordusu və ABŞ hərbçilərinin birgə təşkil etdiyi koalisiya qüvvələri əməliyyatlara başlayıb. Əməliyyatlar nəticəsində İraqda bir çox ərazi İŞİD terrorçularından təmizlənib. Bu ilin mart ayından başlayaraq Mosul şəhəri mühasirəyə alınıb. İraqın Mosul şəhərində İŞİD terrorçularına qarşı əməliyyatlar davam edir.

Ziya Səccad
Ölkə.Az