Yəməndə neft tankerinə hücum olub
“Ölkə.Az” xəbər verir ki, bu barədə Avropa İttifaqının "EU NAVFOR" missiyası məlumat yayıb. Verilən məlumata görə, Qırmızı dənizin Yəmən sahillərində naməlum şəxslər neft tankerinə hücum ediblər.
Hadisə mayın 31-də səhər saatlarda Bab-əl-Məndəb boğazının cənub hissəsində qeydə alınıb. Qayıqda olan 3 nəfər silahlı Marşal Adaları bayrağı altında üzən neft tankerinə atəş açıb. Gəmiyə tərəf üç reaktiv qumbara atılıb. Daha sonra silahlılar oradan qaçıblar. Tanker hazırda öz yoluna davam edir.
Hadisənin təfərrüatları araşdırılır. İlkin ehtimala görə, hücum Yəməndəki hərbi əməliyyatlarla əlaqədar piratlar tərəfindən edilib. Hadisə ilə bağlı heç bir qruplaşma məsuliyyəti öz üzərinə götürməyib.
Qeyd edək ki, Yəməndə 2014-cü ildən etibarən siyasi böhran və vətəndaş qarşıdurması başlayıb. Ölkədə baş verən qarşdurma 2015-ci ildə daha da şiddətlənib. Nəticədə hökumət istefa vermək məcburiyyətində qalıb. Yəmən prezidenti Abd Rəbbuh Mənsur əl-Hadi ölkədə baş verən Yəmən inqilabının ardından Əli Abdullah Salehin yerinə prezident seçilib. Salehin dönəmində onun əsas silahdaşlarından sayılan Mənsur Hadinin hakimiyyətə gətirilməsilə də sakitlik yaranmayıb.
Yəməndə Şiə əhalisinin dəstəklədiyi Husi silahlıları ilə hökümət qüvvələri arasında baş verən toqquşmaların 2015-ci ilin ilk ayında şiddətlənməsinin ardından hökümət istehfa vermək məcburiyyətində qalıb. Yəmənin paytaxtı Sana şəhəri Husi terrorçularının nəzarəti altına keçib. Terrorçularla mübarizə aparmaq üçün Səudiyyə Ərəbistanının başçılıq etdiyi koalisiya yaradılıb. Həmin koalisiya qüvvələri 2015-ci ildən başlayaraq Yəməndə əməliyyatlar keçirir.
Ziya Səccad
Ölkə.Az
