Tikinti kooperativi ətrafında qalmaqal: "Dağlar MTK" bir mənzili neçə nəfərə satdı?

Bakı şəhərində “Dağlar MTK”-nın tikdiyi bina ilə bağlı Ölkə.az-ın redaksiyasına şikayət məktubu daxil olub.

“Dağlar MTK”-nın tikdiyi binadan ev almış sakinlər evlərinin açarlarını tələb edəndə məlum olub ki, evlər eyni zamanda bir neçə adama satılıb.

Bununla bağlı şikayətçilər polisə prokrorluğa şikayət etsələr də nə onların evləri özlərinə verilir, nə də pulları geri qaytarılır.

Şikayətçilərin sözlərinə görə, Bakı şəhər Nərimanov rayonu, Təbriz küçəsi 63 ünvanında yerləşən 15 mərtəbəli binada yerləşən “Dağlar MTK”-dan mənzillər alıblar. Ancaq kooperativin rəhbər şəxsləri müxtəlif bəhanələrlə açarları onlara verməkdən imtina edib, onları mənzillərə yaxın qoymayıblar. Sonradan bu mənzillərin iki və daha çox vətəndaşa satıldığı bəlli olub. Avqust 2014-də Kooperativin Sədri Şahin Əliyev artan təzyiqlərə davam gətiməyib qaçıb gizlənib. Kooperativin Təsisçisi və bu dələduzluğun təşkilatçısı Çinqiz Rzayev hal hazırda onu gizlədir və müxtəlif hüquq-müdafiə orqanlarında “məsələni həll edir” ki, onları həbs etməsinlər. Vətəndaşların pulunu qaytarmaqdan isə söhbət belə getmir.

Şikayətçilər “Bizə, yəni aldadılmış vətəndaşlara özünün bu işlərdən tam xəbərsiz olduğunu söyləyir. Bir fikir verin - kooperativdə 25-dən artıq saxta mənzil satılır, hər gün onlarla adam kooperativə gəlib sədr Şahin Əliyevlə və oranın komendantı Əjdər ilə hay-küy salır, kooperativin sahibi Çinqiz Rzayev isə deyir ki, mənim heç nədən xəbərim yox idi.

Burada qeyd etmək yerinə düşər ki, bu işin təşkilatçıları və iştirakşıları olan Çinqiz Rzayev, Şahin Əliyev və komendant Əjdər çox yaxin qohumdurlar (xala oğlu, əmi oğlu) və hər gün “ işləri müzakirə etmək üçün” görüşüblər.

Sentyabr ayına kimi şikayətçilərin ərizələrinə Nərimanov rayon polis idarəsi baxıb. Avqustun 15-dən kooperativin sədri Şahin Əliyevə cinayət işi açılıb və onun haqqında “SAXLA” qərarı verilib. Ancaq Ş.Əliyevin xarici pasportunun olmadığını və onun hər gün həyat yoldaşı və oğlu ilə telefonla əlaqə saxladığı bəlli olsa da, ölkə ərazisində olan və heç də ”bərk” gizlənməyən Ş.Əliyevi saxlamaq “mümkün olmur”. Deyildiyi kimi Kooperativin Sahibi Çinqiz Rzayev bu məsələləri həll etməyə çalışır. Sentyabr ayından istintaq Baş prokurorluğun Korrupsiya ilə mübarizə İdarəsinə verilib. İşi müstəntiq Ziyafət Quliyev aparır.

Əldə etdiyimiz məlumata görə, zərərçəkənlərin bəzilərinin ifadəsi hələ də alınmayıb.

İşin küllü miqdarda puldan və iri miqyaslı dələduzluqdan getdiyi bəlli olsa da, istintaq Çingiz Rzayevin və Şahin Əliyevin əmlakına həbs qoyulmayıb. Bu həbsi, müstəntiqin təqdimatı ilə məhkəmə qoyur ancaq məhkəmə qarşısında belə bir məsələ qaldırılmayıb.

Çinqiz Rzayevə məxsus bəzi obyektlərin siyahısını sizə təqdim edirik: “ “Dağlar MTK”-nın Təbriz küç.63-də yerləşən 15 mərtəbəli binanın 1-ci və 2-ci mərtəbəsində yerləşən, bir ay öncəyə qədər mebel mağazası kimi fəaliyyət göstərən, ümumi sahəsi 1000 kv.m olan , bazar qiyməti 1 kv.m 3500 manat, ümumi qiyməti 3,5 million manat olan qeyri yaşayış sahsi məxsusdur. Bu mağaza artıq Çinqiz Rzayev tərəfindən satışa çixarılıb.
Yeni Yasamalda “Dağlar MTK”ya məxsus olan binanın 1-c- və 2-ci mərtəbəsində yerləşən mağaza-bir ay öncə Çinqiz Rzayev tərəfindən 800 000 manata satılıb
Azadlıq prospekti və Teymur Əliyev küçələrinin kəsişməsində yerləşən, təxmini qiyməti 500 000 manat olan “GƏNCƏ” Kafe-Restoranı-da Cinqiz Rzayevə məxsusdur. . Onun Əhmədli qəsəbəsində də bir necə obyektinin olduğu bildirirlir”.

Bir maraqlı faktı da sizin nəzərinizə çatdırmaq istərdik. “Axtarışda” olan Şahin Əliyevin oğlu Məhəmmədin Milli Təhlükəsizlik Nazirliyinin kapitanı olduğu bildirilir. Ümid edirik ki, “tapılmayan” Sahin Əliyevi Məhəmməd Əliyev çox asanlıqla tapa bilər...