"Həyatı bizimlə sevin" adlı rəsm sərgisi keçirildi

İyun ayının 1-i Uşaqların Beynəlxalq Müdafiəsi Günü kimi qeyd olunur. Sumqayıt şəhərində "Uşaqların Beynəlxalq Müdafiəsi Günü"nə həsr edilmiş "Həyatı bizimlə sevin" adlı maraqlı rəsm sərgisi keçirilib.

Ölkə.Az xəbər verir ki, Gənclər şəhəri kimi tanınan Sumqayıtda istedadlı gənc nəsil böyüyür. "Sumqayıt Plaza Hotel"in təşkilatı dəstəyi, Gənc rəssam Nigar Arifqızının təşəbbüsü ilə keçirilən rəsm sərgisində müxtəlif yaş qruplarından olan kiçik rəssamların bir-birindən gözəl əl işləri nümayiş olunub. 

Rzayeva Nigar Arif qızı 1982-ci ildə Sumqayıt şəhərində anadan olub. 2000-2005-ci illərdə Azərbaycan Dövlət Rəssamlıq Akademiyasında təhsil alıb. Peşəkar rəssam kimi ilk fəaliyyətinə Uşaq və Yeniyetmələrin Yaradıcılıq Mərkəzində başlayan Nigar müəllimə, 2007-ci ildən Sumqayıt Dövlət Rəsm Qalereyasında tərtibatçı rəssam kimi, 2015-ci ildən bu günə qədər isə Sumqayıt Olimpiya İdman Kompleksində rəssam-müəllim kimi fəaliyyət göstərir.

"Həyatı bizimlə sevin" adlı rəsm sərgisində vətənpərvər ruhda və təbiət mövzusunda çəkilmiş bir-birindən maraqlı 70-ə yaxın rəsm əsəri və əl işləri (daş və şüşə üzərində təsvirlər) nümayiş olunub.

Nigar Arifqızı deyir ki, uşaqlarla işləmək ona xüsusi zövq verir: " Mən uşaqları çox sevirəm. Onların özlərinə məxsus sehirli dünyaları var. Hər zaman çalışmışam ki, uşaqların kiçik, məsum dünyası rəngarəng boyalarla işlədikləri əsərlər qədər gözəl olsun. Rəssam olmaq həm də gözəl müşahidəçi olmaq deməkdir. Bu gün ki, sərgidə gördüyünüz əsərlərin hər biri bir dünyadır. Bu əsərlər uşaqların emosialarının tərənnümüdür. Onlara rəssamlığın incə sirlərini öyrətdikcə, sanki mən də həyata onların gözündən baxmağa başlayıram. Bu mənə inanılmaz zövq verir. Məhz buna görə də, bu tədbiri "Həyatı bizimlə sevin" adlandırmışam".

Sərgi yerli sakinlər tərəfindən çox böyük maraqla qarşılanıb. Tədbirdə qonaqlara Nigar xanımın 46 balaca rəssamlarının əl işləri təqdim olunub. Bundan başqa fortepiano, skripka və trambon kimi musiqi alətlərində Azərbaycanın və dünya bəstəkarlarının kompozisiyalarından ibarət ifalar səsləndirilib.

Sərgidə kiçik rəssamların valideynləri, peşəkar rəssamlar, şəhər rəhbərliyi ilə yanaşı tədbirin xüsusi qonaqları İndira Şəmsizadə və Sumqayıt şəhər 1 nömrəli Uşaq Gənclər İdman Məktəbinin direktoru Aslanov Fuad da iştirak edib.

Tədbirin sonunda balaca rəssamlara sertifikatlar təqdim olunub.