Müsavat Divanının iclasını keçirdi

Bu gün Müsavat Partiyasının Divanının növbəti iclası keçirilib. 

Divanda qərarların icrası və görülən işlər barədə məlumat verilib.

Yığıncaqda Divan üzvü Elman Fəttah Şirvan şəhərində keçirilən Şirvan şəhər və Hacıqabul rayon təşkilatlarnın görüşü barədə məlumat verib. Müşavirədə Bələdiyyə seçkiləri, rayon təşkilatının fəaliyyətinin gücləndirilməsi, partiyadaxili məsələlər müzakirə olunub.

Divanda Bələdiyyə seçkilərində müşahidənin təşkili, rayon təşkilatları qarşısında duran vəzifələrin müzakirəsilə bağlı partiya rəhbərliyinin iştirakı ilə Səbail, Zəngilan, Nəsimi və Nizami rayon təşkilatlarında genişləndirilmiş şura iclaslarının keçirilməsi barədə qərar qəbul edilib. Qərarın icrası Təşkilat Departamentinə tapşırılıb.

23 noyabr 2014-cü il tarixdə partiyanın Mərkəzi Qərargahında keçirilən ümumrespublika müşavirəsi müzakirə edilib. Müşavirədə kütləvilik, partiyanın qarşısında duran vəzifələrin müzakirəsi, partiyadaxili demokratiyanın nümunəsi olmaq baxımından yüksək qiymətləndirilib.

Divan noyabrın 23-də keçirilən ümumrespublika müşavirəsində və partiyanın yerli təşkilatlarında irəli sürülən təklifləri nəzərə alaraq, Beynəlxalq insan hüquqları günü münasibətilə dekabrın 14-də saat 15.00-da “Məhsul” stadionunda mitinq keçirilməsi barədə qərar qəbul edib.

Divanda siyasi məhbuslar, o cümlədən Müsavat Partiyasından olan siyasi məhbuslarla bağlı bəyanat qəbul edildi (mətn əlavə edilir).

Divan AXCP təşkilat şöbəsinin müdiri Rafiq Daşdəmirlinin oğlu Sənan Daşdəmirlinin şərlənərək narkotika ilə ittiham edilməsini pisləyir və dərhal həbsdən azad olunmasını tələb edib.

Sonda cari məsələlərə baxılıb. (qaqazinfo)

Ölkə.Az