Londonu qana boyayan üçüncü terrorçunun adı məlum oldu

"Ölkə.Az" xəbər verir ki, bu 1995-ci ildə Mərakeşin Fəs şəhərində anadan olan Yusif Zaqbadır.

 

Yusifin atası Mərakeş sakini, anası isə İtaliya vətəndaşıdır. Ailə dağıldıqdan sonra anası İtaliyaya qayıdaraq Bolonya ətrafında məskunlaşıb. İtaliya xüsusi xidmət orqanlarının məlumatına əsasən, Yusif bir neçə dəfə anasına baş çəkib. 2016-cı ilin mart ayında o, Bolonya hava limanında saxlanılıb. Buradan Yusif Türkiyəyə uçmaq, oradan isə Suriyaya keçmək istəyirmiş. Polis araşdırması zamanı Yusifin telefonunda dini məzmunlu foto və videolar tapılıb. Amma onun islamçılarla birbaşa əlaqəsinə dair heç bir fakt tapılmayıb.

 

Bundan sonra Yusif təhlükəli şəxslər siyahısına daxil edilib. Onun məlumatları Britaniya və Mərakeş xüsusi xidmət orqanlarına göndərilib. Bu yaxınlara qədər Yusif Britaniya paytaxtında yaşayıb və restoranda ofisiant işləyib.

 

Qeyd edək ki, 3 iyun tarixində 3 terrorçu avtomobili London körpüsünün üstündə piyadaların üstünə sürüblər. Sonra isə Boro-market bazarına yaxınlaşaraq bıçaqla küçədən keçənlərə hücum ediblər. 7 nəfər həlak olub, 48 nəfər isə yaralanıb.

 

Hücum edənlər polis tərəfindən zərərsizləşdirilib.