Yəməndə vəbadan ölənlərin sayı 700 nəfəri keçib

"Ölkə.Az" xəbər verir ki, bu barədə Ümumdünya Səhiyyə Təşkilatı məlumat yayıb. Verilən məlumata görə, xəstəlikdən ölənlərin sayı 700 nəfəri keçib.

Məlumatda bildirilib ki, 27 apreldən iyunun 4-nə qədər virusa yoluxanların sayı 86,4 min nəfəri ötüb.

Qeyd edək ki, bir müddət əvvəl Ümumdünya Səhiyyə Təşkilatının mətbuat katibi Tarik Yazareviç bildirmişdi ki, Yəməndə vəba və qarın yatalağından bir ay ərzində 500-dən çox adam ölüb. Onun sözlərinə görə, ölənlərin sayı durmadan artır.

“Aprel ayının 27-dən  mayın 28-nə qədər 55202 nəfərdə vəba və qarın yatalağı virusları aşkar edilib. Onlardan 500-dən çoxu ölüb”, - deyə Tarik Yazareviç bildirib.

Tarik Yazareviç deyir ki, ötən ilin oktyabr ayından başlayaraq, xəstələr arasında ölüm halları azı 4 dəfə çoxalıb. Onun sözlərinə görə, Ümumdünya Səhiyyə Təşkilatı tərəfindən Yəmənə 67 tondan çox dərman və iynələr göndərilib.

“Bu dərmanların 2015-ci ildən bəri Yəməndə başlayan virusun qarşısını almaqda böyük köməyi olub. Lakin xəstəliyi tam məhv etmək mümkün deyil. Biz bunun qarşısında çox acizik”, - deyə qurum rəsmisi vurğulayıb.

Ziya Səccad
Ölkə.Az