Masallı İH “azadlıq radiosu”nu təkzib etdi
Açıqlamada deyilir: “Azad mətbuat”, “azad söz”, “demokratiya”, “insan haqlarının müdafiəsi” ifadələrini şüar edib, fəaliyyətində bunlara tam zidd hərkətləri ilə ad çıxarmış “Azadlıq radiosu” növbəti dəfə şər-böhtan, yalan, dezinformasiya maşınını işə salıb. Saytda artıq neçənci dəfədir ki, Masallı rayonu haqda yalan, həqiqiliyi birmənalı şəkildə şübhə doğuran, heç bir mənbə tərəfindən təsdiqlənməyən, əksinə, inkar edilən yazı dərc olunur.
Masallı rayonunda taxıl sahələrinin su altında qalması və badımcan sahələrində xəstəliklərin yayılması ilə bağlı bəzi KİV-lərdə “Azadlıq” radiosuna istinadən yayılan məlumatlar Masallı rayon İcra hakimiyyəti tərəfindən araşdırılıb.
Məqalədə Masallı rayonun Təklə kənd sakini Səmədağa Həsənovun fikirlərinə yer verilib. O kənd təsərrüfatı məhsulların əkini ilə bağlı “problemlərdən” danışıb. Daha sonra Səmədağa Həsənov (AXCP üzvüdür) tərəvəzdən, cəfəri plantasiyalarından, tədarükçülərin aşağı qiymətə məhsul almasından, alıcı azlığından şikayət edib.
Yazıda Masallı rayonun Həsənli kənd sakini Toğrul Mərhəmlinin də fikirlərinə yer verilib. Siyasi partiyalardan birinin gənclər təşkilatının sədri olan T. Mərhəmli badımcan sahələrində xəstəliyin yayıldığından danışıb.
Əvvəla, onu deyək ki, jurnalistikasında peşə etikası deyilən məvhum var. Qarşı tərəfin münasibətini öyrənmək- jurnalistikanın təməl prinsipləridir. “Azadlıq” radiosu bu ali prinsipi növbəti dəfə pozaraq bitərəfli mövqe nümayiş etdirib.
İkincisi, İcra Hakimiyyətindən verilən məlumata görə, araşdırma zamanı məlum olub ki, “Azadlıq” radiosunun yaydığı məlumat həmişəki kimi əsassız və təxribat xarakterlidir. Belə ki, Təklə kənd sakini Səmədağa Həsənovun (AXCP-nin üzvü) bəzi taxıl sahələrinin su altında qalması ilə bağlı iddiası araşdırılan zaman məlum olub ki, bu şəxs ot kimi biçilən sahələrin taxıl kimi qeydə alınmasını və subsidiya verilməsini tələb edir ki, bu da qanunla mümkün deyil. Qanunsuz tələbi təmin edilmədiyi üçün müxalifət düşərgəsinin Masallıdakı radikal üzvü olan bu şəxs, adəti üzrə qaralama kampaniyası aparmağa çalışır.
Masallı rayonu Həsənli kənd sakini Toğrul Məhərrəmlinin (Müsavat Partiyasının üzvü) badımcan sahələrində xəstəliyin yayılması ilə bağlı məlumatı rayon Kənd Təsərrüfatı İdarəsinin mütəxəssisləri tərəfindən araşdırılıb və əsassız olduğu müəyyən olunub. Bildirilir ki, bu şəxsin özünə məxsus torpaq sahəsində badımcan bitkisi əkilməyib və ən qəribəsi odur ki, verilən məlumatdan xəbərsiz olduğunu bildirib.
Nəhayət, üçüncüsü “Masallıda kənd təsərrüfatında vəziyyət necədir” sualına aydınlıq gətirək.
Məlumat üçün bildiririk ki, Masallı rayonunda 2017-ci ilin məhsulu üçün 11934 hektar sahədə payızlıq əkinlər (7430 hektar buğda, 3055 hektar arpa və 1449 hektar sair əkinlər) aparılmışdır. 4950 hektar torpaq sahəsində isə yazlıq bitkilər əkilib.
Belə ki, 940 hektar sahədə kartof əkini aparılmışdır. Hazırda kartofun çıxarılması yekunlaşmaq üzrədir və tədarükündə heç bir problem yoxdur. 474 hektar sahədə badımcan bitkisi əkilmiş və hazırda yığımına başlanılıb. Bundan başqa rayon ərazisində 187 hektar çəltik, 32.5 hektar tütün, 88 hektar qarğıdalı, 545 hektar pomidor, xiyar, 382 hektar bostan, 63 hektar soğan, 39 hektar sarımsaq, 345 hektar dənli və dənli paxlalı bitkilər, 193 hektar yonca, 34 hektar günəbaxan, 65 hektar bibər və sair bitki növləri əkilmişdir. Bildiririk ki, əkin sahələrinin becərilməsində və suvarılmasında heç bir çətinlik müşahidə olunmur.
Bir sözlə, indi Masallıda hansı kəndə, qəsəbəyə üz tutsan, qızğın iş getdiyinin şahidi olarıq. Hər kəs zəhməti ilə bol məhsul yetişdirmək qayğısı ilə yaşayır. Son illərdə aparılan islahatlar, yeniliklər və qurucluq işləri ilə əlaqədar olaraq bu gün Masallı rayonu Azərbaycanın ən inkişaf etmiş rayonlarından birinə çevrilib. Rayonda abadlıq, quruculuq işləri aparılır, iş yerləri açılır, əhalinin maddi-rifah halının yüksəldilməsi üçün işlər görülür.
Biz, İcra Hakmiyyəti olaraq, bütün sayt rəhbərlərinə müraciət edərək bildiririk ki, əllərində bir əsası olmadan, qarşı tərəfin fikrini öyrənmədən yazıları verməsinlər. İcra Hakmiyyətində medianın işi üçün hər cür şərait və istənilən sualı cavablandıracaq mütəxəssislər var.
Bu qədər sosial inkişafı olan bir rayon haqqında bu cür şər-böhtan xarakterli, yalan informasiya vermək nəinki media prinsiplərinin, eləcə də ali insani hisslərin itirilməsi deməkdir.
Ölkə.Az
