Ağ Evdən açıqlama: “Sanksiyalar Rusiyanın “ipini möhkəm saxlamaq” üçün əla vasitədir”

"Ölkə.Az" xəbər verir ki, bu barədə Ağ Evin nümayəndəsi Sara Sanders jurnalistlərə açıqlamasında bildirib. Onun sözlərinə görə, sanksiyalar Rusiyanın “ipini möhkəm saxlamaq” üçün əla vasitədir.

“Biz Rusiyaya qarşı sanksiyaları saxlayacağıq. Hətta ola bilsin ki, ABŞ Rusiyaya qarşı yeni sanksiyalar tətbiq etsin. Sanksiyalar Ukrayna böhranı nizamlanana və regionda vəziyyət düzələnə qədər qüvvədə qalacaq. Rusiyaya təzyiq etmək üçün ən yaxşı vasitə sanksiyaları gücləndirməkdir”, - deyə Sara Sanders bildirib.

Qeyd edək ki, Rusiya ilə Qərbin münasibətləri 2014-cü ildə Ukrayna-Krım məsələsinə görə pisləşdi. ABŞ və Avropa Birliyi Rusiyaya qarş sanksiyalar tətbiq etməyə başladı. ABŞ-ın 44-cü prezidenti Barak Obama hakimiyyətinin son günlərində Rusiyaya qarşı ardı-ardına 100-ə yaxın sanksiyalar tətbiq edib. Rusiya hökuməti isə ABŞ-ın 45-ci prezidenti Donald Trampın həmin sanksiyaları yüngülləşdirəcəyi, yaxud ləğv edəcəyi barədə ümid etsələr də, son baş verənlər Putin hakimiyyətinin bu arzusunu “ürəyində” qoydu.

Ziya Səccad
Ölkə.az