\"Müsəlman dünyasını zorla orta əsrlərdə saxlamaq cəhdlərinin axırı yoxdur\"

Ərəb ölkələrinin Qətərlə diplomatik əlaqələri kəsməsindən sonra körfəzdə hər an müharibə olacağı gözlənilir. Qətəri müdafiə etmək üçün isə Türkiyə, Pakistan ordu göndərəcəyini bəyan edib. İran isə Qətərə hər cür yardım edəcəyini bəyan edib və bu bəyanata da əməl edir.

Fars körfəzindəki vəziyyətlə bağlı politoloq Zərdüşt Əlizadə fikirlərini "Ölkə.Az"-la bölüşüb:

"Qətərin iki xüsusiyyətinə diqqət etmək lazımdır. Birincisi, Qətər müsəlman dünyasında ən demokratik, ən uğurlu və ən dürüst məlumat verən “Əl-Cəzirə” tele kanalının təsisçisidir. “Əl-Cəzirə” tele kanalı müsəlman dünyasını, ərəbləri, o cümlədən islamda insan haqlarının, demokratiyanın mümkünlüyünü müdafiə edən bir telekanaldır. Bu kanal həmişə bütün mürtəce ərəb rejimlərinin qəzəbinə düçar olub.

İkincisi, Qətər müsəlman dünyasında şura prinsipinə - seçim, kollektiv idarəçiliyin təbliğini aparan "Müsəlman qardaşları" təşkilatını müdafiə edirdi. Həmin "Müsəlman qardaşları" təşkilatının nümayəndəsi Məhəmməd Mursi Misir tarixində ilk dəfə xalq tərəfindən prezident seçildi. Həmin Məhəmməd Mursini rüşvətə və xəyanətə bulaşmış Misir ordusu devirdi. Minlərlə misirlinin qanına əli bulaşmış Əbdül Fəttah əl-Sisi özünü demokratik respublikanın prezidenti adlandırır. Əbdül Fəttah əl-Sisi ilə birlikdə Səudiyyə Ərəbistanı Qətərə cihad elan edib. Bunları isə dağılmış Liviyanın yalnız BMT tərəfindən tanınan hökuməti dəstəkləyir. Hansı ki, o hökumət öz ərazisinə nəzarət edə bilmir. Bundan əlavə, Maldiv adası, vətəndaş müharibəsinin girdabında boğulan Yəməni də siyahıya əlavə etmək olar.

Qətəri müdafiə edən müsəlman dövləti Türkiyədir. O Türkiyə ki, müsəlman dövlətləri arasında demokratiyanın olduğu bir ölkədir. Pakistan və İranda da seçkili demokratiya mövcuddur. Bu ziddiyət mürtəci islam dövlətləri ilə nisbətən islahatların aparıldığı müsəlman dövlətləri arasında olan bir ziddiyyətdir.

Tərəqqinin qarşısını almaq mümkün deyil. Tarixdən də görürük ki, tərəqqinin qarşısını zorakılıqla, təcavüzlə almaq istəyiblər, ancaq alınmayıb. Müsəlman dünyasını zorla orta əsrlərdə saxlamaq cəhdlərinin axırı yoxdur".

Türkiyə və Pakistanın Qətərə ordu göndərmək qərarına münasibət bildirən politoloq bildirdi ki, ordu göndərdiklərini elan etmək göndərdilər anlamına gəlməməlidir:

"Harasa ordu göndərəndə ordunun təminatı, təchizatı, nə edəcəyi düşünülməlidir. Qətərə 3 min türk əsgəri gəlsə o türk əsgəri Səudiyyə Ərəbistanı ilə vuruşacaq? Türkiyəyə lazımdır bu? Pakistan Səudiyyə ilə vuruşacaq? Pakistan bildirib ki, 20 min qoşun göndərəcəm. Əvvəla 20 min qoşun göndərmək asan iş deyil. 20 min qoşunun Qətərə gəlməsi 1-2 ay çəkər. Digər tərəfdən də Qətər balaca ölkədir. Pakistan ordusu oraya necə yerləşəcək? Əksinə özləri hədəf olacaq. 

Türkiyə və Pakistanın bəyanatlarının məqsədi odur ki, Səudiyyəni yumuşaltsınlar. Hər halda son nəticədə güzəştli razılıq əldə olunacaq".

Səxavət Məmməd
Ölkə.Az