Tillerson və Lavrov Qətər münaqişəsilə bağlı danışıblar
"Ölkə.Az" xəbər verir ki, iki ölkə nümayəndəsi Qətər və ərəb dövlətləri arasında yaranmış münaqişə ilə əlaqədar müzakirələr aparıblar.
Bu barədə Rusiya Xarici İşlər Nazirliyinin mətbuat xidmətindən bildirilib. Verilən məlumata görə, yaranmış gərginliyi sülh yolu ilə həll etməyin yollarından danışıblar.
“Tillerson və Lavrov Qətər və ərəb dövlətləri arasında yaranmış münaqişənin həlli yollarından danışıblar. Danışıqlar zamanı gərginliyi mümkün qədər yumşaltmağı və yaranmış problemin həlli istiqamətində görüşlər keçirməyi planlaşdırıblar”, - deyə məlumatda bildirilib.
Qeyd edək ki, Ərəb ölkələri Qətərlə diplomatik münasibətləri kəsib. Bəhreyn, Misir, BƏƏ və Səudiyyə Ərəbistanından sonra Liviya və Yəmən də Qətərlə diplomatik münasibətləri dayandırıb. Bundan başqa İŞİD-ə qarşı aparılan islam hərbi koalisiyasında Qətərin iştirakı da dayandırılıb.
ABŞ prezidenti Donald Tramp Qətər ilə ərəb dövlətləri arasında yaranmış münaqişəni izləmək və problemin həllində vasitəçi olmağı Amerikanın dövlət katibi Reks Tillersona tapşırıb.
Reks Tillerson da öz növbəsində Bəhreyn və Misir dövlətlərinə Qətərlə bağlı müraciət ünvanlayıb. Müraciətdə yaranmış münaqişəyə son qoymaq təklif edilir. Onun sözlərinə görə, ərəb ölkələri ilə Qətər arasında gərginlik ABŞ və onun rəhbərlik etdiyi koalisiya qüvvələrinə İŞİD terror təşkilatı ilə mübarizə aparmaqda mane olur.
Ziya Səccad
Ölkə.Az
