Tereza Mey yeni hökumət qurdu
"Ölkə.Az" xəbər verir ki, mədəniyyət, xarici ticarət, təhsil, nəqliyyat və səhiyyə nazirləri öz postlarında qalıblar.
Mühafizəkarlar partiyasının lideri Tereza Mey növbədənkənar parlament seçkilərinin nəticələrinə əsasən yeni hökuməti qurub. Köhnə kabinetin bir çox üzvü öz postunda qalıb. Mey Mühafizəkarların sədri olanda kabinetdən qovduğu ədliyyə naziri Maykl Qouvun yenidən hökumətə qaytarılması gözlənilməz olub.
Tutqun ab-hava
Son günlər britaniyalı baş nazir əsasən də həmkarları tərəfindən tənqid atəşinə tutulmuşdu. Növbədənkənar seçkilər keçirmək barədə qərar qəbul edən Meyin məqsədi Leyboristlər partiyası timsalında müxalifəti darmadağın etmək, parlamentdə mövqeyini möhkəmləndirmək idi. Amma bunu həyata keçirmək mümkün olmadı. Mühafizəkarlar formal olaraq qələbə qazansalar da, əslində bu məğlubiyyət dadı olan qələbə idi. Palatada əsas hakim mövqeyini itirən partiyanın bu qələbəsini mühafizəkarların faciəsi adlandırırlar. Mey isə hakimiyyəti təhvil verən lider kimi qiymətləndirilir.
Meyin keçmiş həmkarı Devid Kemeron, sabiq maliyyə naziri Corc Osborn baş naziri "canlı meyit" adlandırıb. Onun fikrinə görə, Terezanın son günləridir və nə qədər bu vəziyyətdə davam gətirəcəyi sual altındadır. Osbornun obyektivliyinə şübhə ilə yanaşmaq olar. Çünki məhz Mey ötən il onu nazirlər kabinetinin kənarında saxlayıb.
Bununla belə, tutqun ab-hava yaranmışdı. Bu fonda britaniyalı baş nazir yeni nazirlər kabinetini yaratmaq üçün işə başladı. Onun fikrinə görə, yeni kabinet ölkəyə əminlik və stabillik qazandırmalıdır.
Sensasiyasız ötüşmədi
Birləşmiş Krallıq hökumətinin mətbuat xidməti yeni hökumətdə kimlərin yer aldığı barədə xəbərləri mətbuata ötürəndə vəziyyətin sensasiyasız ötüşməyəcəyi məlum oldu. Köhnə kabinetin üzvlərinin böyük əksəriyyəti postunu qoruyub saxladı. Jurnalistlərdən biri "əgər əslində heç bir yenilik yoxdursa, niyə bu prosedur kabinetdə dəyişiklik adı ilə təqdim edilir" sualını ünvanladı.
Maykl Qouvun ətraf mühitin qorunması, istehsal və kənd təsərrüfatının inkişafı naziri kimi hökumətə qayıtması barədə xəbər yayılanda əsl sensasiya başladı. Devid Kemeronun kabinetində Maykl ədliyyə naziri postunu tutub. Kemeronun istefasından sonra ötən ilin iyun ayında Mühafizəkarlar partiyasının sədri və baş nazir postuna Boris Consonun namizədliyini dəstəklədiyini bildirmişdi. Amma Qouv bu fikrindən vaz keçdi və özü bu yarışa qoşuldu. Onun bu addımı partiya elitası tərəfindən siyasi satqınçılıq kimi dəyərləndirildi və Tereza Mey Mühafizəkarların sədri olan kimi Qouvu vəzifəsindən uzaqlaşdırdı.
Qouv isə yeni təyinatını eşidəndə: "Söyləyim ki, təəccüblüyəm. Mən belə bir vəzifə gözləmirdim. Hökumətin bir parçası olmaqdan məmnunam"-deyib.
Kimi yüksəldib, kimi alçaltdılar
Mey bir sıra məmurların vəzifəsini artıraraq daha məsul işləri onlara yüklədi. Məsələn, nazirlər kabinetinin baş katibi Demian Qrin oldu. Bu vaxta qədər o, əmək və sosial müavinət naziri idi. Maliyyə nazirliyinin baş katibi postunu tutan Devid Qok indi əmək və sosial müavinət naziri oldu. Devid Lindinqton ədliyyə naziridir. O, bu vaxta qədər İcmalar Palatasının lideri olub.
Bu vaxta qədər ətraf mühit, istehsalat və kənd təsərrüfatının inkişafı üzrə nazir postunu tutan Andrea Lidsin vəzifəsi artırılıb. O, Gizli Şuranın sədr-lordu olub. Bununla da, ölkənin dördüncü şəxsinə çevrilib. Gizli Şura kraliça II Yelizavetanın müşavirləri orqanıdır. Onun əsas işi monarx üçün sənədlər hazırlamaqdır.
Sabiq ədliyyə naziri Elizabet Trassın vəzifəsi aşağı salınıb. O, Britaniya maliyyə nazirinin birinci müavini təyin edilib.
Status-kvonu saxlayanlar
Köhnə kabinetin bir çox üzvü vəzifəsində qalıb. Onlar arasında səhiyyə naziri Ceremi Han, region və yerli idarəetmə üzrə nazir Sacid Cavid, Şimali İrlandiya məsələləri naziri Ceyms Brokenşir, Uels məsələləri üzrə nazir Alun Krens, Şotlandiya məsələləri üzrə nazir Devid Mandell də var. Eyni zamanda beynəlxalq inkişaf məsələləri üzrə nazir Prayti Patel, nəqliyyat naziri Kris Qreylinq, biznes, energetika və sənaye naziri Qreq Klark, xarici ticarət naziri Liam Foks, təhsil naziri Castin Qrininq, mədəniyyət, mətbuat və idman naziri Karen Bredli də vəzifələrində qalıblar.
Parlament təşkilatçısı Qevin Uilyamson, İngiltərənin və Uelsin baş prokuroru Ceremi Rayt, Lordlar palatasının lideri funksiyasını yerinə yetirən, nəşriyyat lordu Natali Evans da vəzifəsində qalıb.
İlk iş günü
Bir müddət əvvəl mətbuat xidməti Meyin rəhbərliyi altında olan əsas nazirlərin yeni hökumətdə də təmsil olunacağını bildirmişdi. Maliyyə naziri Filip Hammond, xarici işlər naziri Boris Conson, müdafiə naziri Maykl Fellon, daxili işlər naziri Ember Radd və Breksit məsələləri üzrə nazir Devid Devis öz işinə davam edir.
Kabineti qurduqdan sonra Tereza Mey hökumətin ilk iclasını keçirəcəyini bəyan etmişdi. 13 iyun tarixində isə baş nazir Fransaya, Emmanuel Makronla görüşə yollanacaq. Eyni gündə Mey Şimali İrlandiya partiyasının sədri Arlin Fosterlə də danışıqlar aparacaq.
Hikmət
Ölkə.Az
