\"Ölkə.Az\" mənzil almaq üçün namizədlərini müəyyənləşdirdi

Bu gün "Ölkə.Az" xəbər portalının redaksiyasında ölkə Prezidentinin “Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında” 22 iyul 2013-cü il tarixli sərəncamı əsasında jurnalistlər üçün inşa olunmuş yaşayış binasındakı mənzillərin bölgüsündə iştirak edəcək namizədlərin müəyyənləşdirilməsi üçün iclas keçirilib.

İclasda müşahidəçi kimi Azərbaycan Respublikasının Prezidenti yanında Kütləvi İnformasiya Vasitələrinə Dövlət Dəstəyi Fonudunun Müşahidə Şurasının və mənzillərin bölgüsü ilə bağlı yaradılmış komissiyanın üzvü Müşfiq Ələsgərli iştirak edib. 

İclasa sədrlik edən Ölkə.Az xəbər portalının baş redaktoru Məmməd Gülməmmədov mətbuata göstərilən dövlət qayğısından bəhs edib, Azərbaycan Prezidenti İlham Əliyevə jurnalistlərin mənzil-məişət şəraitinin yaxşılaşdırılması məqsədilə tikilən binaya görə minnətdarlığını bildirib. 

M.Gülməmmədov "Ölkə.Az" xəbər portalının mənzil bölgüsündə iştirakından danışıb:

"Namizədlərin tələblərə uyğun seçilməsi vacib məsələdir. KİVDF-nin elan etdiyi meyarlar məlumumuzdur və biz də buna uyğun seçim etməliyik. "Ölkə.Az" xəbər portalı Azərbaycanda elektron medianın inkişafına öz töhfəsini verən, peşəkarlığı önə şəkən, qaydalar çərçivəsindən çıxış edən, dövlətçiliyə xidmət göstərən mətbuat orqanıdır. Portalımız Azərbaycan mətbuatında öznəməxsus yerə malikdir.  Dövlətimiz hər zaman peşəkar jurnalistin fəaliyyətini qiymətləndirib. Biz də kollektiv olaraq haqqı, ehtiyacı olan jurnalistlərin mənzil şəraitinin yaxşılaşdırılması işini dəstəkləyirik".

KİVDF-də yaradılmış Komissiyanın üzvü Müşfiq Ələsgərli iclasda iştirak edən redaksiya əməkdaşlarına bir daha ətraflı məlumat verərək qeyd edib ki, heç bir ölkədə mətbuat işçilərinin mənzil-məişət şəraitinin yaxşılaışdırılması üçün belə bir addım atılmır. M.Ələsgərli bu təmənnasız hədiyyəyə görə, Prezident İlham Əliyevə təşəkkür edib və KİVDF-nin əsas niyyətinin şərtlərə uyğun, ədalətli seçim aparmaq olduğunu bildirib:

"Azərbaycan Prezidentinin hər zaman medianın yanında olub, jurnalist əməyinə yüksək qiymət verib. Azərbaycanda ev, mənzil sahibi olmaq önəmli məsələdir və mentalitetimizdə buna xüsusi yanaşma var. Biz xarici ölkələrdə səfərlərdə olarkən görürük ki, elə adamlar var ki, milyonçudur, amma ipoteka ilə götürdüyü evdə yaşayır, ya da kirayədə qalır. Bizdə isə evə yanaşma başqadır, ev bir nəslin ocağı anlamındadır. Ona görə də Allah hər bir ehtiyacı olan kəsə ev qismət eləsin".

M.Ələsgərli bildirib ki, qeyri-rəsmi statistikaya görə, ölkədə 25 mindən çox jurnalist var. Onlar daimi, mövsümi çalışanlar, peşəkarlar və qeyri-peşəkarlardır. 

"Bilirik ki, 25 min jurnalistin 20 min nəfərini kənara qoyduqda, real şəkildə ölkədə informasiya yükünü çəkən 3-4 min jurnalistimiz qalır. Həmin jurnalistlərin isə ev almaq haqqı var və hər kəs istəyər ki, bu tarixi fürsətdən istifadə etsin. Amma nə edəsən ki, jurnalistləırin sayı çox, mənzillərin sayı məhduddur.
 
Bu prosesdən kənarda qalmaq jurnalistlər üçün ümidsizlik olmalı deyil. Artıq növbəti binanın da təməlqoyma mərasimi keçiriləcək və ümid edək ki, növbəti dəfə daha çox jurnalist evlə təmin olunacaq. Nə qədər ki, mediaya dövlət qayğısı davam edir, həmin strategiya da davam edəcək".

İclasda mənzillərin verilməsi üçün elan olunmuş şərtlərə uyğun gələn əməkdaşlarla bağlı müzakirə aparılıb. Açıq səsvermə nəticəsində yaradıcı heyətdən mənzil bölgüsündə iştirak üçün iki nəfər - "Ölkə.az" xəbər portalının baş redaktoru Məmməd Gülməmmədov və müxbir İntiqam Alıyevin (Valehoğlu) nazmizədliyi müəyyənləşib. 

İclasda iştirak edən əməkdaşlar səsvermədə iştirak ediblər. Səsvermənin yekun nəticələrinin müvafiq komissiyaya təqdim olunması qərara alınıb

Fotoıar: Çinarə Vahabzadə