Töhmət aldığı deyilən YAP-çı deputat DANIŞDI

Milli Məclisin insan haqları komitəsinin və Yeni Azərbaycan Partiyasının (YAP) üzvü olan deputatı Elman Nəsirov söylədiyi fikirlərə görə hakim partiya tərəfindən cəzalandırılması barədə yayılan məlumatlara münasibət bildirib.

E.Nəsirov “Ölkə.Az”-a açıqlamasında yayılan xəbərləri təkzib edib:

“Nə töhmət, nə danlanmaq? Bütün bunların hamısı yalan və cəfəngiyyatdır. Mənə heç bir xəbərdarlıq və ya töhmət olmayıb. Bilirsiniz, bütün bunların hamısı müxalif qüvvələrin beyinlərinin saxta məhsullarıdır. Oturub bir yerdə özlərinin uydurmalarını yazırlar. Sonra da mətbuata ötürürlər”.

Deputat açıqlamasının “Azadlıq radiosu” tərəfindən təhrif olunduğunu da iddia edib:

“Mənim fikirlərim blogger Aleksandr Lapşinlə bağlı olub. Ancaq “Azadlıq radiosu” mənim fikirlərimi təhrif edib. Mənim Lapşinlə bağlı söylədiyim fikirlər Əfqan Muxtarlı haqqında demişəmmiş kimi təqdim olunub. Bir daha deyirəm ki, “Azadlıq radiosu” fikirlərimi təhrif edib. Mən Əfqan Muxtarlı ilə bağlı fikir bildirmədiyim halda, “Azadlıq radiosu” mənim Lapşin barədə sözlərimi Əfqan Muxtarlı adı ilə yayıb”.

Vasif Həsənli
Ölkə.Az