Reks Tillerson ABŞ ordusunun Suriyada olmasına aydınlıq gətirdi
"Ölkə.Az" xəbər verir ki, bu barədə ABŞ dövlət katibi Reks Tillerson senatda çıxış edərkən bildirib. Onun sözlərinə görə, ABŞ yürütdüyü siyasi kursu dəyişməyib.
“Bizim ordunun Suriyaya girməsinin və orada müharibə aparmasının bir səbəbi var. Biz Suriyada İŞİD terrorçuları ilə mübarizə aparırıq. Amerikanın Suriya siyasəti həmişə bu olub və bundan sonra da dəyişməyib. Çalışırıq ki, İŞİD terrorçularını tam məhv edək”, - deyə Reks Tillerson bildirib.
Çıxış edərkən senatorlardan biri Suriyada hökumət qüvvələrinin mart ayından sonra xalqa qarşı yenidən kimyəvi silahdan istifadə etməsilə bağlı sual verib. Reks Tillerson bu məsələnin həmişə diqqət mərkəzində saxladıqlarını bildirib: “Biz həmişə bu məsələni diqqətdə saxlayırıq”.
Qeyd edək ki, ABŞ ordusu 2014-cü ildən Suriya ərazisinə girib. ABŞ və onun rəhbərlik etdiyi koalisiya Suriyada İŞİD terror təşkilatı ilə mübarizə aparır.
Xatırladaq ki, aprelin 7-ə gecə ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Amerika rəsmiləri bunu Bəşər Əsəd qüvvələrinin xalqa qarşı kimyəvi silahdan istifadə etməsilə əsaslandırıb. Aprelin 4-də Bəşər Əsəd rejiminə aid hərbi təyyarələrin İdlib şəhərinə zərbələr endirməsindən sonra kimyəvi zəhərlənmə nəticəsində çoxlu sayda insan ölüb və yaralanıb.
Ziya Səccad
Ölkə.Az
