Londonda yanğın dəhşəti

"Ölkə.Az"-ın xəbərinə görə, London polisi bildirib ki, yanğın nəticəsində ən azı 6 nəfər həlak olub. Rəqəm tam dəqiqləşdirilməyib. Çünki bir sıra sakinlər binanı tərk edə bilməyib və alov tələsində qalıblar.

Hadisə şahidləri bildirirlər ki, bəzi sakinlər sağ qalmaq niyyəti ilə pəncərədən tullanıblar.

***

"Ölkə.Az" xəbər verir ki, Londonun Kensinqton rayonunda 27 mərtəbəli yaşayış binasında baş verən yanğın nəticəsində bir neçə nəfər həlak olub. Bu barədə Britaniya paytaxtının fövqəladə hallar xidməti məlumat verib. Xəsarət alanların sayı 50-ə qədər artıb.

İkinci mərtəbədən sonuncu mərtəbəyə qədər başlayan yanğının səbəbləri hələ də məlum deyil. Qeyri-rəsmi məlumata görə mənzillərdən birində soyuducunun partlaması buna səbəb ola bilər.

***

"Ölkə.Az" xəbər verir ki, gecə saatlarında başlayan yanğın səhərə qədər davam edib. 200 yanğınsöndürənin müdaxilə etdiyi yanğında ölənlərin olub-olmadığı hələ də dəqiqləşdirilməyib. Binanın yuxarı mərtəbələrində ilişib qalanların olduğu iddia edilir. Bəzi hadisə şahidləri isə binadan tullananların olduğunu bildirib. İlk rəsmi açıqlamaya əsasən hadisə nəticəsində 30 nəfər yaralanıb. Yanğının səbəbi hələ də bilinmir.

Polisə verilən məlumatdan sonra hadisə yerinə çoxsaylı polis və təcili yardım əməkdaşı cəlb edilib. Bundan başqa 200 nəfər yanğınsöndürən və 40 ədəd yanğınsöndürən avtomobil hadisə yerinə gəlib. Binanı tam cənginə alan alovu ram etmək üçün ciddi işlər görülür.

Binada yaşayanlar təxliyyə edilib. Amma ölənlərin olub-olmadığı barədə heç bir rəsmi açıqlama verilməyib. Bina çökmə təhlükəsi ilə üz-üzə qalıb. Hadisə şahidləri bildirib ki, bəziləri binadan aşağı tullanıb, bəziləri isə mələfələri bir-birinə bağlayaraq aşağı enməyə çalışıb.
Televiziya aparıcısı Corc Klark isə yuxarı mərtəbədə qalanların əl fənərləri ilə yardım istədiyini, çölə çıxa bilmədiklərini bildirib. İki nəfər tüstüdən zəhərləndikləri üçün müalicə olunur.

Hikmət
Ölkə.Az