Rusiyaya qarşı sanksiyaların müddəti uzadılacaq
"Ölkə.Az" xəbər verir ki, bu barədə Avropa İttifaqına üzv ölkələrin Xarici İşlər Nazirliyi rəhbərlərinin planlaşdırılan iclasında qəbul ediləcək qərar layihəsində bildirilir.
Məhdudiyyətlər Aİ vətəndaşlarına və şirkətlərinə Krım və Sevastopoldan Aİ ölkələrinə malların idxalını, bu ərazilərdə turizm xidmətlərinin göstərilməsini qadağa edir.
Qeyd edək ki, ABŞ Senatı Rusiyaya qarşı yeni sanksiyaları nəzərdə tutan qanun layihəsini qəbul edib. İyulun 14-də keçirilən səsvermədə yeni qanun layihəsi səs çoxluğu ilə qəbul edilib. Yeni qanunda həmçinin İrana qarşı sanksiyalar da nəzərdə tutulub. Yeni qanun layihəsinə görə, ABŞ prezidenti Donald Tramp Konqresin razılığı olmadan sanksiyaları zəiflədə bilməz.
Qeyd edək ki, layihəyə görə, sanksiyalar bu dəfə Rusiya banklarına tətbiq edilir. Bundan sonra amerikalı biznesmenlər və şirkətlər Rusiya bankları ilə maliyyə əməliyyatları aparmayacaq. Yeni qanun layihəsində həm də nəzərdə tutulub ki, Rusiya enerji maliyyələşdirmələrinə də qadağalar tətbiq edilsin.
Xatırladaq ki, Rusiya ilə Qərbin münasibətləri 2014-cü ildə Ukrayna-Krım məsələsinə görə pisləşdi. ABŞ və Avropa Birliyi Rusiyaya qarş sanksiyalar tətbiq etməyə başladı. ABŞ-ın 44-cü prezidenti Barak Obama hakimiyyətinin son günlərində Rusiyaya qarşı ardı-ardına 100-ə yaxın sanksiyalar tətbiq edib. Rusiya hökuməti isə ABŞ-ın 45-ci prezidenti Donald Trampın həmin sanksiyaları yüngülləşdirəcəyi, yaxud ləğv edəcəyi barədə ümid etsələr də, son baş verənlər Putin hakimiyyətinin bu arzusunu “ürəyində” qoydu.
Ziya Səccad
Ölkə.Az
