"Biz bu gün Rəsulzadənin qaldırdığı bayrağın altında birləşmişik"

Bəzi millət vəkilləri, siyasətçilər, jurnalistlər Məhəmməd Əmin Rəsulzadəni ləkələmək üçün sanki yarışa giriblər.

Məhəmməd Əmin Rəsulzadə haqqında deyilənlər barədə AXCP sədri Razi Nurullayev fikirlərini "Ölkə.Az"-la bölüşüb:

"Hər dövrün bir qəhrəmanı olur. Ötən əsrin əvvələrinin də qəhrəmanı Məhəmməd Əmin Rəsulzadə olub. Məhəmməd Əmin Rəsulzadə Azərbaycana sərhədləri müəyyən edilmiş bir ölkə qoyub gedib. Onun üçün də Məhəmməd Əmin Rəsulzadəyə atılan çamurlar, ləkələr işləyə bilməz. Onun məhəbbəti Azərbaycan xalqının qəlbindədir. Sadəcə olaraq bir çox siyasətçilər, dövlət xadimləri Məhəmməd Əmin Rəsulzadə, Əbülfəz Elçibəyə olan sevgi qədər sevilmək istəyirlər. Təbii ki, bu olmadığı üçün paxıllıq, qısqanclıq yaranır. Buna görə də, Məhəmməd Əmin Rəsulzadənin təhqir edilməsi, onun xidmətlərinin kiçildilməsi artıq siyasi prosesə çevrilib. Bu təbii ki, yolverilməz bir məsələdir".

Azərbaycan Milli Elmlər Akademiyasının (AMEA) Tarix İnstitutunun direktoru, Milli Məclisin deputatı Yaqub Mahmudovun "Hər şeyi Məhəmməd Əmin Rəsulzadənin adı ilə bağlamaq lazım deyil" fikirinə münasibət bildirən AXCP sədri qeyd etdi ki, hər bir liderin ətrafında minlərlə ağıllı başları, məsləhətçiləri, nazirləri, generalları olur:

"Sultan Süleyman az qala dünyanın yarısını fəth etmişdi, ancaq Sultan Süleymanın da yanında paşaları var idi. Ağıllı paşaları, vəzirləri olmasaydı o da qələbə çala bilməzdi. Məgər müharibədə Stalin qalib gəldi? Təbii ki, yox. Müharibəni Stalinin generalları, xalq qazandı. Ancaq hər bir qələbə Stalinin adına yazıldı. Uinston Çörçill böyük bir diplomat, dövlət xadimi olub. Əgər Çörçillə məsləhət verənlər, generalları olmasaydı təbii ki, İngiltərə bu günkü İngiltərə, Çörçill də, Çörçill ola bilməzdi.

Ona görə də, hər dövrün, zamanın bir qəhrəmanı var. Həmin dövrün də lideri Məhəmməd Əmin Rəsulzadə olub. Özünün tərəfdaşları, dövlət xadimləri, generalları ilə bərabər bizə, Azərbaycan xalqına sərhədləri müəyyən edilmiş bir dövlət qoyub gedib. Bu gün də həmin dövlətin sahibiyik. Onun qaldırdığı bayrağın altında birləşmişik".

Razi Nurullayevin səsləndirdiyi fikirlərin videogörüntüsünü sizə təqdim edirik:

Səxavət Məmməd
Ölkə.Az