Mixail Boqdanov ərəb dövlətlərinin səfirlərilə Qətər məsələsini müzakirə etdi

Rusiya xarici işlər nazirinin müavini Mixail Boqdanov Moskvada ərəb dövlətləri səfirlərilə görüş zamanı Qətər məsələsini müzakirə edib.

"Ölkə.Az" xəbər verir ki, bu barədə Rusiya Xarici İşlər Nazirliyindən məlumat verilib. Verilən məlumata görə, məsələ ilə əlaqədar Mixail Boqdanov Birləşmiş Ərəb Əmirliklərinin, Misirin, Bəhreynin, Səudiyyə Ərəbistanının səfirlərini qəbul edib. Danışıqlar zamanı ərəb dövlətlərinin Qətərlə diplomatik münasibətləri kəsməsi məsələsi müzakirə edilib.

“Görüş zamanı tərəflər Yaxın Şərqdə aktual məsələlər ətrafında fikir mübadiləsi aparıblar. Danışıqlar zamanı ərəb ölkələrinin Qətərlə diplomatik münasibətləri, eləcə də, nəqliyyat, biznes və ticarət əlaqələrinin kəsilməsi məsələsini müzakirə ediblər”, - deyə məlumatda bildirilib.

Qeyd edək ki, Ərəb ölkələri Qətərlə diplomatik münasibətləri kəsib. Bəhreyn, Misir, BƏƏ və Səudiyyə Ərəbistanından sonra Liviya və Yəmən də Qətərlə diplomatik münasibətləri dayandırıb. Bundan başqa İŞİD-ə qarşı aparılan islam hərbi koalisiyasında Qətərin iştirakı da dayandırılıb.

Ziya Səccad
Ölkə.Az