Düşmən ordunun sayı şişirdilir

Ermənilər bu ölkədəki çağırışçı sayını müəyyən etmək istəyən istənilən beynəlxalq cəhdi düşməncəsinə qarşılayırlar.

Axırıncı belə bir hadisə keçən ay baş vermişdi. Ermənistanın Avrasiya İttifaqına daxil olması münasibəti ilə gəlmiş Rusiya hərbi nümayəndə heyətinin bu cəhdi erməni mətbuatında sərt tənqid edilmişdi.

Ermənistan rəsmilərinin bu ciddi-cəhdi erməni ordusunun dəqiq sayını gizlətmək istəyi ilə bağlıdır. Ermənilər dəfələrlə bəyan edirlər ki, ordularında 70 mindən çox əsgər var. Axırıncı belə bir bəyanatı Ermənistan prezidenti Serj Sarkisyan da vermişdi, Azərbaycanın işğal edilmiş ərazitlərində keçirdikləri hərbi təlimlərə 70 min əsgərin cəlb ediləcəyini bildirmişdi. O, 40 min əsgərin Ermənistan ordusuna, 30 min əsgərin isə “Dağlıq Qarabağ ordusu”na aid olacağını iddia eləmişdi. Amma erməni mətbuatının dərc etdiyi fotolarda təlimlərdə 2-3 min hərbçinin iştirak etdiyini açıqca görmək olurdu.

Müstəqil araşdırmalar göstərir ki, ermənilər orduda olan əsgər sayını bir neçə dəfə şişirdirlər. Məsələ bundadır ki, Ermənistanda çağırış yaşında olan gənclərin sayı heç 40 minlik ordunu belə təmin etməyə imkan vermir. Bunu statistikadan rahatca görmək olar. Bu faktı gizlətmək üçün ermənilər bir sıra statistik məlumatları gizlədirlər. Azərbaycan kimi düşmən saydıqları ölkələrdən isə statistika xidmətinin “www.armstat.am” saytına girmək olmur.

Amma ermənilərin bu günə düşəcəklərini ağıllarına gətirmədikləri 1990-cı illərin sonlarında beynəlxalq təşkilatlar tərəfindən buraxılmış bir sıra statistika toplularından doğulanların sayını götürməklə Ermənistanda çağırışçıların maksimum mümkün sayını müəyyən eləmək olar. Məsələn, TACİS proqramı tərəfindən Cənubi Qafqaz ölkələri üzrə 2000-ci ildə buraxılmış statistika toplusunda 1996-cı ildə Ermənistanda təxminən 25 min oğlan dünyaya gəlib. Həmin müddətdən bu yana Ermənistanda rəsmi qeydiyyata olan əhali təxminən 20 faiz azalıb. Beləliklə, Ermənistan həm işğal edilmiş Azərbaycan ərazilərində, həm də öz ərazilərində dislokasiya olunmuş silahlı qüvvələrinə ildə 20 mindən artıq çağırışçı təmin edə bilməz. Xəstələri, tələbələri və s. Nəzərə aldıqda real say daha aşağıdır. Ermənistanda müddətli hərbi xidmətin 2 il olduğu nəzərə alınarsa, düşmən ordusunun əsgər sayının 40 mindən çox olmadığını anlamaq olur. Halbuki, Ermənistan rəhbərliyi toplam güclərinin 70-80 min ətrafında dəyişdiyini iddia edir. Məhz bu cür müəmmalı məlumatlara görə, beynəlxalq analitika qurumları tutduqları reytinq siyahılarına Ermənistan ordusunu salmırlar. Azərbaycan ordusu isə Rusiya, Ukrayna və Özbəkistan ordularından sonra postsovet məkanı üzrə 4-cü yeri tutur.(Anspress)