Sabirabad rayonunda gənc təlimçilər formalaşdırılır

Gənclər üçün Təhsil Mərkəzi Azərbaycan Respublikası Gənclər və İdman Nazirliyinin maliyyə dəstəyi ilə icra etdiyi “Gənclər evlərində təlimçilər klubunun yaradılmasına və şəbəkələşməsinə dəstək” layihəsi çərçivəsində Sabirabad rayonunda silsilə təlim proqramına başladı.

Sabirabad Gənclər Mərkəzində baş tutan açılış mərasimində Rayon İcra Hakimiyyəti Başçısının birinci müavini Həsən Həsənov, Rayon Gənclər və İdman İdarəsinin rəisi Nadir Quliyev  və digər qonaqlar iştirak etdilər. 

Qonaqlar layihənin əhəmiyyətini qeyd edərək, Sabirabad rayonunda gənc təlimçilərin formalaşdırılmasının zəruri olduğunu, gənclər arasında maarifçilik işinin onlar vasitəsilə aparılmasının səmərəli olacağını diqqətə çatdırdılar. Bildirildi ki, gənc nəslin yetişdirilməsi və onların hərtərəfli inkişafına şərait yaratmaq ölkədə həyata keçirilən  gənclər siyasətinin ana xəttidir. 

Daha sonra layihə haqqında təqdimat keçirildi. Qeyd olundu ki, proqramın əsas məqsədi regionlarda fəaliyyət göstərən gənclər evləri ilə yerli gənclər arasında əməkdaşlığın gücləndirilməsi, gənclər arasında qeyri-formal təhsil metodologiyasının təşviq olunması, təlimçilik bacarıqlarının inkişaf etdirilməsi və gənc təlimçilərin şəbəkələşməsinə dəstək verməkdir. Bildirildi ki, layihənin növbəti mərhələlərində təlim keçmiş gənclərin iştirakı ilə gənclər evlərində təlimçilər klubu qurulacaq və onlar üçün zəruri şərait yaradılacaq. Daha sonra yaradılmış təlimçilər otağı müəyyən olunmuş cədvələ uyğun olaraq, gənclər üçün müxtəlif mövzularda təlim xidmətlərini həyata keçirəcək.

Daha sonra təlimçilərin hazırlanması üçün iştirakçılar qruplara bölündülər. Təlimlər gənc ekspertlər Vüsal Əhmədov və Murad Həsənli tərəfindən keçirildi. 

Qeyd edək ki, pilot layihənin Gəncə və Mingəçevir şəhərlərində, habelə Quba və Sabirabad rayonlarında yerləşən gənclər evlərini əhatə etməsi nəzərdə tutulub. 

Ölkə.Az