Moskva ABŞ-ın Əsədə qarşı səsləndirdiyi ittihamlara cavab verdi

"Ölkə.Az" xəbər verir ki, Kremlin mətbuat katibi Dmitriy Peskov Amerika hökumətinin səsləndirdiyi ittihamların əsassız olduğunu deyib. Onun sözlərinə görə, Ağ Evin Əsəd rejiminin ünvanına dediyi sözlərin heç bir əsası yoxdur.

“Biz Amerika hökumətinin bəyanatı ilə tanış olduq. ABŞ-ın səsləndirdiyi kimi Suriya ordusunun xalqa qarşı kimyəvi hücuma hazırlaşması barədə sübutlar yoxdur. Biz anlaya bilmirik ki, Amerika hökuməti bu ittihamları nəyin əsasında irəli sürüb”, - deyə D.Peskov bildirib.

Rusiya rəsmisi əlavə edib ki, əgər həqiqətən də Suriya xalqına qarşı təhlükə varsa, bu işə mütləq müdaxilə edilməlidir: “Əlbəttə ki, Rusiya da Suriya xalqına qarşı kimyəvi silahdan istifadə edilməsini pisləyir. Rusiya bu məsələyə hər an müdaxilə etməyə hazırdır. Lakin biz əmin deyilik ki, bu təhlükə məhz Əsəd rejimindən gəlir. Ola bilər ki, bu İŞİD terror təşkilatının ortaya atdığı təxribatdır”.

Qeyd edək ki, bu gün ABŞ Suriya hökumətini yenidən xalqa qarşı kimyəvi silah işlətməyə hazırlaşmaqda günahlandırıb. Ağ Evin ittihamlarına görə, Bəşər Əsəd rejimi yenə də xalqa qarşı kimyəvi silahlardan istifadə etməyə hazırlaşır. Verilən bəyanata görə, Suriya ordusu bu dəfə də günahsız insanların ölümünə səbəb ola bilər.

Ağ Ev xəbərdarlıq edib ki, əgər bir də xalqa qarşı kimyəvi silah tətbiq edilərsə, bu Əsədə baha başa gələcək: “Bu dəfə Amerika Əsəd rejiminin əməlllərinə daha sərt cavab verəcək. Əgər əhaliyə qarşı kimyəvi hücum təkrarlanarsa, Suriya ordusu bunun əvəzini daha ağır ödəyəcək”.

Xatırladaq ki, bu ilin aprel ayının 4-də Bəşər Əsəd rejiminə aid hərbi təyyarələr İdlib şəhərinə zərbələr endirib. Zərbələrin endirilməsindən sonra kimyəvi zəhərlənmə nəticəsində 80 nəfərdən çox insan ölüb və 200 nəfər yaralanıb. Bundan sonra aprel ayının 7-də ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Homs qubernatoru zərbə nəticəsində 5 hərbçi və 2 mülki şəxsin öldüyünü bildirib. Tramp, raket zərbəsinin kimyəvi silahdan istifadənin təkrarlanmasının qarşısını almaq məqsədilə endirildiyini deyib.

Ziya Səccad
Ölkə.Az