Azərbaycan müxalifətində lidersizlik problemi var?

Bir çoxları siyasi bir liderin olmadığı üçün müxalifətin arxasınca getmədiyini bildirir. Həqiqətən Azərbaycanda lidersizlik problemi var?

"Ölkə.Az"-ın bu sualını AXCP sədri Razı Nurullayev cavablandırıb:

"Azərbaycanda lidersizlik problemi yoxdur. Bəzən deyirlər ki, xalqı öz arxasınca apara biləcək lider yoxdur. Əslində ölkəni idarə edə biləcək kifayət qədər adam var. Məsələyə bir qədər dərindən baxmaq lazımdır. Liderlərin lider kimi xalq tərəfindən tanınması və qəbul edilməsi üçün siyasi proses, abu-hava lazımdır. Bu proseslər SSRİ-nin dağılması ilə baş verdi və xalqın içərisində yatan şir qalxdı. Xalq özünün vicdanına, namusuna qısıldı, liderlərinə inandı, təmənnasız mübarizəyə qoşuldu, evində olan son qəpiyini mübarizə üçün sərf etdi, Dağlıq Qarabağ üçün vuruşdu, küçədə yatdı. Bütün bunlar proses idi. O prosesdə həm yararlı, həm də yararsız siyasətçilər ortaya çıxdı. Bu gün yenə də həmin insanların bir çoxu siyasətdədir. Ancaq xalq artıq onları qəbul edə bilmir".

Ölkədə yeni siyasətçilərin yetişdiyini deyən Razi Nurullayev özünü də onlardan biri hesab edirək bildirdi ki, mən özümü də o siyasətçilərin sırasına yazıram və kifayət qədər uğurlu işlərimiz də var:

"Azərbaycanda yeni bir proses yetişməlidir, yeni bir siyasi proses olmalıdır. Hələ ki, bu yoxdur. Bunun üçün müəyyən zaman keçməlidir. Gözləyirəm ki, yenidən Azərbaycanda siyasi proses başlasın. Azərbaycanın cəmiyyətini silkələyə biləcək, cəmiyyəti dəyişə biləcək bir siyasi prosesə ehtiyac var. Bu proses qlobal bir prosesin bir parçası kimi də Azərbaycan görünə bilər. Misal üçün "Ərəb baharı" baş verdi, ancaq Azərbaycana gəlib çata bilmədi. Çünki bunun üçün Azərbaycan əsaslar olmadı. Artıq Azərbaycan bu prosesi 90-cı illərdə keçmişdi. Bu proses yenidən Azərbaycanda olacaq. Bəlkə də yetişir. Doğurdan da Azərbaycanda ağır sosial durum var, xalqda inam formalaşmalıdır. ELə bir proses baş verməlidir ki, o prosesin qabağında gedək, özümüzü sübut edək, xalq da arxamızca gəlsin. Ancaq indi xalq mənim arxamca gəlsin demək olmaz, çünki bunu xalq qəbul etdirmək olmaz. Bir misal çəkim, Əbilfəz Elçibəy 60-cı illərdən mübarizə olub, ancaq onu heç kim tanımayıb. Elçibəy disident olub, SSRİ-yə qrşı mübarizə aparıb, gizli təşkilatlar yaradıb, ancaq o, SSRİ-nin dağılma prosesi başlayanda parlamağa başladı. Onunla yanaşı yeni siyasi liderlər də parlamağa başladı. Azərbaycanda o həcmdə və ona bənzər problemlər olmalıdır ki, yeni liderlər görünə bilsinlər".

AXCP sədri Razi Nurullayevin lidersizlik problemi ilə bağlı səsləndirdiyi fikirləri videorsujetimizdə sizə təqdim edirik:

Səxavət Məmməd
Ölkə.Az