Beynəlxalq Diaspor Mərkəzindən BƏYƏNAT

Bu ilin iyul ayının 4-də Ermənistan silahlı qüvvələrinin Füzuli rayonunun Alxanlı kəndini atəşə tutması nəticəsində 1967-ci il təvəllüdlü Quliyeva Sahibə və onun nəvəsi 2 yaşlı Quliyeva Zəhra faciəvi surətdə həlak olmuşdur. İnsanlıqdan nəsibini almamış Ermənistan hakimiyyətinın bu qanlı hadisəsi Beynəlxalq Diaspor Mərkəzini və bütün xalqımızı hiddətləndirmişdir.

ATƏT-in Minsk qrupunun, eləcə də aparıcı beynəlxalq təşkilatların ədalətsiz yanaşmasının nəticəsidir ki, Ermənistan yüz ildən artıqdır xalqımıza qarşı apardığı soyqırımın bu gün də davamı olaraq yenə də amansızlıqla qocaları, qadınları, uşaqları qətlə yetirməkdən, təmas xəttinə yaxın ərazilərdə  yaşayan mülki əhalini hədəfə almaqdan çəkinmir. Bütün beynəlxalq hüquq normalarını, konvensiyaları pozan Ermənistana qarşı heç bir tədbirin görülməməsi Azərbaycana qarşı ikili standartların, qərəzli münasibətin və işğalçı dövlətə qarşı birbaşa dəstəyin sübutudur.

Beynəlxalq Diaspor Mərkəzi ATƏT həmsədrlərindən, BMT Təhlükəsizlik Şurasının üzvlərindən işğalçı Ermənistanın dinc əhaliyə qarşı törətdiyi cinayətlərə görə cəzalandırılmasını tələb edir. Həmçinin bu hadisələrə görə dövlətləri Ermənistan rəhbərliyinə qarşı sanksiyaların tətbiq olunmasına çağırırıq.

Ölkə.Az