Səfər Qaraqoyunlu: “Azərbaycan müharibə etsə, Ermənistanı yerlə yeksan edəcək”
S.Qaraqoyunlu “Ölkə.Az”-a açıqlamasında deyib ki, hazırda işğalçı Ermənistan odla oynayır və bütün region üçün təhlükə yaradır.
Onun sözlərinə görə, Ermənistandan fərqli olaraq, Azərbaycan bölgədə sülh istəyir:
“Ermənistan özü müharibə istəyir və Azərbaycanı da buna təhrik edir. Azərbaycan sülhsevər dövlətdir və təkcə regionda deyil, bütün dünyada sülhün olmasına çalışır. Eyni zamanda Azərbaycan beynəlxalq hüququn tələblərinə uyğun olaraq öz ərazi bütövlüyünün bərpa olunmasını, torpaqlarının ilk növbədə sülh yolu ilə azad edilməsini istəyir. Əgər müharibə yolunu istəsəydi, indiyədək işğalçı Ermənistanı yerlə yeksan etmiş və torpaqları çoxdan azad etmiş olardı. Sadəcə olaraq Azərbaycan istəyir ki, daha qan tökülməsin, torpaqlar sülh yolu ilə azad olunsun, regionda sülh və əmin-amanlıq yaransın, insanlar öz evlərinə qayıtsınlar”.
S.Qaraqoyunlu qeyd edib ki, türk milləti olaraq hər zaman yaraları sarımağa hazırıq:
“Amma Ermənistanın törətdikləri cinayətlər insanlığa sığmır. Adətən, müharibələr hərbçilər arasında olur. Daha Ermənistanın etdiyi kimi azyaşlı körpələr və mülkü əhali öldürülmür. Ermənistan hərbçiləri isə 2 yaşlı körpə Zəhra Quliyevanı və 50 yaşında bir qadını vəhşicəsinə qətlə yetiriblər. Bunun məsuliyyətini Ermənistan rəhbərliyi daşıyır. Əks halda bir gün türk millətinin səbri daşacaq və ordu öz sözünü deyəcək. Biz Ermənistanı və bu qanlı hadisəyə göz yuman bütün qüvvələri şiddətlə qınayırıq. Türk milləti olaraq da sonadək Azərbaycanın yanındayıq”.
S.Qaraqoyunlu vurğulayıb ki, türk millətinin, o cümlədən Azərbaycanın səbri artıq tükənmək üzrədir:
“Regionda sülhün və əmin-amanlığın olması üçün Ermənistan işğal etdiyi Azərbaycan ərazilərindən dərhal geri çəkilməlidir. Əks halda Azərbaycan müharibə etsə, Ermənistanı yerlə yeksan edəcək”.
Xatırladaq ki, iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin müki əhalisinin və mülki obyektlərinin hədəflənmiş şəkildə və qəsdən 80 və 102 millimetrlik minaatanlardan və dəzgahlı qumbaraatanlardan atəşə tutması nəticəsində 1967-ci il təvəllüdlü Quliyeva Sahibə və onun nəvəsi 2 yaşlı Quliyeva Zəhra həlak olublar.
Digər mülki şəxs, 1965-ci il təvəllüdlü Quliyeva Sərvinaz yaralanıb və mülki obyektlərə zərər yetirilib.
Vasif Həsənli
Ölkə.Az
