Avropa İttifaqının yeni sanksiyaları qüvvəyə mindi

"Donetsk Respublikası", "Luqanşinaya sülh", "Azad Donbas", "Xalq ittifaqı", "Luqansk iqtisadi ittifaqı" təşkilatları "qara siyahıda" yer alıblar.

Dünən xəbər verdiyimiz kimi, Avropa İttifaqının şurası özünü elan etmiş Donetsk və Luqansk xalq respublikalarının 13 yaraqlısına qarşı sanksiyaların tətbiqini təsdiq etmişdi.

Bu haqda məlumat Avropa İttifaqının qanunverici orqanının rəsmi saytında yerləşdirilən bəyanatda yayılmışdı və məhdudlaşdırıcı tədbirlərin Avropa İttifaqının rəsmi jurnalında dərc edildikdən sonra qüvvəyə minəcəyi bildirilmişdi.

Ölkə.Az Gazeta.ru saytına istinadən xəbər verir ki, bu gün isə həmin sanksiyalar rəsmən qüvvəyə minib. Belə ki, yeni siyahıda Luqanskın Mərkəzi seçki komissiyasının sədri Sergey Kozyakov, özünü elan etmiş Luqansk Xalq Respublikasının Səhiyyə naziri Larisa Ayrapetyan və Donetsk Xalq Respublikası və Luqansk Xalq Respublikasının daha 11 nümayəndəsi yer alıb. Bundan əlavə, qeyd olunduğu kimi, beş təşkilat Aİ-nın sanksiyalarının təsirinə düşüb. "Donetsk Respublikası", "Luqanşinaya sülh", "Azad Donbas", "Xalq ittifaqı", "Luqansk iqtisadi ittifaqı" təşkilatları "qara siyahıda" yer alıblar.

Xatırladaq ki, ümumillikdə isə Brüsselin Ukraynanın ərazi bütövlüyünə qarşı aksiyalarda iştirak etməkdə günahlandırdığı üçün "qara siyahıya" salınan şəxslərin sayı 132-ə çatıb. Onlardan 28 nəfər fiziki şəxs hesab olunur.

Rəşid Mustafazadə

Ölkə.Az