Tural Abbaslı: "İsa Qəmbər inanmıram ki, oyuna gəlsin..."
Rauf Arifoğlu sonuncu müsahibəsində "Müsavat" partiyasında başqanın dəyişməsi və İsa Qəmbərlə bağlı maraqlı fikirlər səsləndirib. Rauf Arifoğlu bildirib ki, "Başqanımız İsa bəyin yanlış qərarı nəticəsində "Müsavat" partiyası da böhrana girdi. Əminliklə deyirəm ki, o, getməməli idi, başqanlıqda qalmalı idi. Bizə başqanımızın demokratiya nümunəsi göstərməsi lazım deyildi, biz bu barədə ədəbiyyat oxumuşuq. Bizə başqanımızın bizi hakimiyyətə gətirməsi lazım idi. Başqan olandan 21 il sonra “ortaya nümunə qoyacam” deyib, başqanlıqdan getməsi...bizə, mənə lazım deyildi".
Rauf Arifoğlunun səsləndirdiyi bu fikri "Müsavat" partiyasının məclis üzvü Tural Abbaslı Ölkə.az-a şərh edib:
Tural Abbaslı: "Bu gizli bir məqam deyil. Bunu partiyada hər kəs deyirdi ki, İsa bəy başqanlıqdan getməsin. Bu demokratik bir addım kimi görsənir, ancaq partiya idarəçiliyi ilə dövlət idarəçiliyi arasında fərq var. Təqribi hesablanırdı ki, İsa Qəmbərdən sonra onun özündə birləşdirdiyi o birləşdiricilik keyfiyyətini, içi mən qarışıq digər namizədlər özündə ehtiva edə bilməyəcək. Bu məsələ ilə bağlı İsa bəyə çox təkidlər oldu. İçi mən qarışıq hamımız İsa bəyə dedik ki, bəlkə qurultayda nizamnamə dəyişdirilsin, bəlkə başqanlıqada qalasınız, bəlkə qurultayı təxirə salaq, bəlkə, bəlkə..., ancaq İsa bəy sona qədər öz mövqeyində qəti qaldı. Qurutay keçirildi, yeni başqan seçildi, amma bu gün "Müsavat" partiyasında baş verən prosseslər sübut edir ki, Azərbaycan cəmiyyəti üçün də, "Müsavat" üçün də belə dəyişiklik tez idi.
- İsa Qəmbərin demokratiya uğurunda atdığı addım partiya üçün uğursuz oldu?
- Bunun uğurlu və uğursuz tərəfləri var. İndiki qarşıdurmalar, partiyadan istefalar, partiyadakı narazılıqlar, partiyadakı gərginliyi nəzərə alsaq, ümumilikdə uğursuz olduğunu deyə bilərik. İndki halda məqsəd 2015-ci ildə keçiriləcək parlament seçkilərinə hazırlaşmaq, partiyanı möhkəmləndirmək, partiyanın genişlənməsini təmin etmək idi isə, hal-hazırda daxili problemlərlə əlləşirik.
Azərbaycanda yaratdığı nümunə baxımından, hakimiyyətə göstərilən nümunə baxımından həm də müsbət tərəfləri var bu hadisənin. Ən azından İsa bəy bir ənənə, yenilik qoydu. Seçki yarışı göstərdi, ədalətli seçkinin necə olduğunu, demokratik mühitdə yarışın nəticələrinin necə olduğunu göstərdi. 1992-ci ildəki Elçibəyin prezident seçildiyi dönəmdən sonra yeganə nümunədir ki, qurultayımızda demokratik prinsiplərlə seçki yarışı keçdi. Hər hadisənin mənfisi-müsbəti olduğu kimi bunun da mənfi və müsbət cəhəti oldu.
- Qurultaydan öncə sosial şəbəklərdə, mediada belə bir fikir formalaşdı ki, yenə də qurultay keçirilməyəcək. Demək olar ki, İsa Qəmbər oyuna gəldi? Nümunə olaraq İsa Qəmbərin etdiyi gözəl görsənir, ancaq Türklərin belə bir deyimi var, "Əsas Haticə yox, nəticədir"...
- İsa Qəmbər inanmıram ki, oyuna gəlsin amma hər halda sizin dediyiniz faktorların böyük təsiri oldu. İctimai fikir olsun, mətbuat olsun, sosial şəbəkələr olsun, hakimiyyətin də yox, öz müxalifət adlandırdığımız kəsimin də mövqeləri məsələnin bu yöndə həllinə təbii ki, öz təsirini mütləq edib. İclasların birində demişdim ki, ictimayətə sübut etmək üçün qurultay keçirmək məcburiyyətində deyilik. Buna məcbur qaldığımız üçün etməli deyilik. Biz ictimai qınaqdan çəkinib siyasət yürütməməli idik. Əminəm ki, İsa bəyin qərarında o basqının rolu böyük oldu. İctimai basqı, fikir çox önəmlidir.
Səxavət Məmməd
Ölkə.az
