Nigar Köçərli Hacıbala Abutalıbovun qərarına etiraz etdi

Reklam lövlərinin çıxarılması mağaza sahiblərinin etirazına səbəb oldu

Bakının mərkəzində yerləşən obyektlərin qarşısında şəhərin gözəlliyinə xələl gətirən reklam lövhələrinin sökülməsi ciddi etiraza səbəb olub.

Ölkə.az xəbər verir ki, "Əli və Nino" kitab mağazaları şəbəkəsinin və Milli Kitab Mükafatının təsisçisi Nigar Köçərli şəxsi Facebook hesabında Bakı İcra Hakimiyyətinin yanında Reklam və İnformasiya departamentinin apardığı tədbirlərdən narazılığını bildirib.

Fəvvarələr meydanındakı “Əli və Nino” kitab evinin sahibi Nigar Köçərli Ölkə.az-a baş verən hadisə ilə bağlı danışıb.

"İki gün bundan öncə gəlib reklam çarxını söküb apardılar. Biz o zaman ciddi etiraz etdik. Bir neçə saatdan sonra yenidən reklam lövhəsini gətirib quraşdırdılar. Bu gün isə eyni hadisə yenidən baş verdi. Onlar bunu qanunsuz lövhə adlandırır. Hansı ki, o lövhə qanunidir. Biz buna görə ödəniş də etmişik. Onlar səhvlərini boyunlarına almaq, üzr istəmək əvəzinə prezidentin adından yalandan istifadə edib, bu cür qanunsuzluqlara yol verirlər".

Qeyd edək ki, noyabrın 27-də Bakı şəhərinin mərkəzində yerləşən obyektlərin qarşısındakı tanıtım lövhələrinin sökülməsi ilə bağlı məlumat yayılmışdı. Obyekt sahiblərinin verdiyi məlumata görə, obyektlərə məxsus lövhələri özlərini təqdim etməyən mülki geyimli şəxslər tərəfindən çıxarılmışdır.

Ölkə.az