Məhəmmədrəsul Məcidovdan möhtəşəm qələbə

Daha iki boksçumuz qalib gəlib.

Noyabrın 30-da “Sərhədçi” Olimpiya İdman Mərkəzində AİBA Pro Boxing turnirində ikinci turun görüşləri keçirilib.

Yarışda 2 qat dünya, Avropa çempionu, olimpiya oyunlarının bürünc mükafatçısı Məhəmmədrəsul Məcidov uzun müddət – 1 il davam etmiş fasilədən sonra yenidən rinqə çıxıb.

Məhəmmədrəsul ukraynalı Sergey Verveyko ilə qarşılaşıb.

Cəmi 2 raund davam edən döyüş Məhəmmədrəsulun möhtəşəm qələbəsi ilə başa çatıb. Boksçumuz idmançını 2 dəfə nokdauna göndərib texniki nokautla qələbə qazanıb və bundan sonra Verveykonun məşqçisi dəsmalı rinqə ataraq, döyüşü saxlayıb.

AİBA Pro Boxing turnirində mübarizə aparan daha iki boksçumuz qalib gəlib. Tamerlan Abdullayev AİBA Pro Boxing turnirində Gyula Keyti xal hesabı ilə məğlub edib.

Daha sonra öz döyüşlərini Argentinada keçirən 56 kq çəki dərəcəsində çıxış edən dünya çempionu Cavid Çələbiyev rinqi qələbə ilə tərk edib. Həmyerlimiz Türkiyə boksçusu Səlcuk Eker üzərində qələbə qazanıb – 3:0 (54:60, 56:58, 55:59). Digər görüşlərdə keniyalı Benson Njangiru venesuelalı Yoni Blankonu, braziliyalı Robenilson Vieyra çinli Jiavei Janqı, argentinalı Alberto Melian isə Fransa nümayəndəsi Xedafi Djelxiri məğlub edib. Xatırladaq ki, Çələbiyev ilk görüşdə braziliyalı Robenilson Vieyraya xal hesabı ilə uduzmuşdu./Oxu.az/