\"PKK kürd xalqına mənsub olan bir təşkilat deyil\"

PKK-nın Ermənistan və işğal altındakı Dağlıq Qarabağda təlim məntəqələrinin olması iddiası ilə yanaşı iddia olunur ki, PKK və digər terrorçu təşkilatların nümayəndələri Ermənistan ordusunun tərkibində təlimlərdə iştirak edirlər.

Bunlarla bağlı hərbi ekspert Tərlan Eyvazov "Ölkə.Az"-a danışıb:

"PKK SSRİ xüsusi xidmət orqanları tərəfindən yaradılıb. PKK-nın yönü də sırf kommunizm yönümlüdür. Bu gün də bu davam etməkdədir. Türkiyə ilə Ermənistan sərhəd qonşusu olduğu üçün SSRİ o zaman bunu Ermənistan xüsusi xidmət orqanlarının əli və erməni mütəxəssislərinin köməyi ilə edib. Bu gün də bu əlaqələr qalmaqdadır və davamlı şəkildə iş aparılmaqdadır. PKK kürd xalqına mənsub olan bir təşkilat deyil. Bu terror təşkilatı ideologiya üzərində qurulub. PKK-nın aparıcı mütəxəssisləri kürdlərlə yanaşı, həm də ermənilərdir".

Ermənistan və Dağlıq Qarabağda PKK terrorçularına ayrıca düşərgələrin yaradılmasına gəldikdə isə hərbi ekspert bildirdi ki, bu gün dünyada terrorizmə qarşı mübarizə aparıldığı üçün, Ermənistan və Dağlıq Qarabağ ərazisində onlara ayrıca düşərgələrin yaradılması mümkün deyil:

"Digər tərəfdən isə Ermənistan yaxşı əlaqələri olan İrana görə belə bir addımı atmaz. Çünki, İran ərazisində PKK-nın PEJAK qolu fəaliyyət göstərir. Ermənistan onlara düşərgə yaratmaq üçün şərait yaradarsa İrandan məhrum olar. Bütün bunlara görə də, Ermənistan bu fəaliyyətini açıq yox, öz ordusunun tərkibində həyata keçirir. Açıq şəkildə təlim məntəqələri olarsa və bu sübuta yetərsə, Ermənistan və Dağlıq Qarabağın qondarma rəhbərliyi dünya ilə üz-üzə qalar.

Erməni xüsusi xidmət oraqlarının PKK və digər kürd terror qruplaşmalarına təlim keçməsi dəfələrlə Türkiyə xüsusi xidmət orqanları tərəfindən sübut olunub".

Səxavət Məmməd
Ölkə.Az