Sabahdan Bakı üzrə məktəbəhazırlıq qruplarına elektron qeydiyyat başlayır

"Ölkə.Az" "Report"a istinadən xəbər verir ki, sentyabrın 18-nə qədər davam edəcək qeydiyyatda ərizələrin qəbulu elektron sistem vasitəsilə həyata keçiriləcək.

Bakı Şəhəri üzrə Təhsil İdarəsinin (BŞTİ) İnformasiya təminatı sektorunun müdiri İlhamə Abdullayeva bildirib ki, məktəblərdə sənəd qəbulu isə avqustun 1-dən sentyabrın sonuna qədər olacaq.

O qeyd edib ki, növbəti tədris ilində BŞTİ-nin tabeliyində 266 ümumi təhsil müəssisəsində 936 məktəbəhazırlıq qrupu fəaliyyət göstərəcək:

"Məktəbəhazırlıq qruplarında məşğələlər oktyabrın 2-də başlayacaq. Səkkiz ay davam edən məşğələlər mayın 31-də başa çatacaq".

İdarə rəsmisi onu da əlavə edib ki, yeni tədris ili üçün paytaxtın ətraf qəsəbələrində yerləşən ümumi təhsil müəssisələrindəki məktəbəhazırlıq qruplarına daha çox uşağın cəlb edilməsi planlaşdırılır: "Yeni tədris ilində məktəbəhazırlıq qruplarına ümumilikdə 25 mindən çox uşağın cəlb olunması nəzərdə tutulur". 

Ölkə.Az