Nazirlik dondurma bazarında reyd keçirdi

Tərkibində həyat və insan sağlamlığı üçün təhlükəli olan malların hələ də böyük marketlərdə satışı həyata keçirilir.

Bununla bağlı Azad İstehlakçılar Birliyinin sədri Eyyub Hüseynov "Ölkə.Az"-a danışıb:

"Biz bu mövzuda araşdırma aparmamışıq, yalnız istehlakçıların zənglərinə cavab veririk. 2011-ci ildə ABŞ-ın İnkişaf Agentliyi bizə müraciət edərək təhlükəsiz qida istehsal edən şirkətlərə təhlükəsiz qida nişanını verməyi təklif etdi. Həmin nişan qeydiyyata alındı və 2011-ci ildən bu günə qədər cəmi bir dondurma istehsal edən "İceland" şirkəti həmin sertfikatı ala bilib. Digər dondurma istehsalçılarına belə bir nişan şamil olunmayıb. Əhali bizə müraciət edir ki, dövlət orqanları qadağan etsə də, ancaq qadağan edilmiş dondurmaların satışı həyata keçirilir".

Bu işi aparan dövlət orqanlarının səhvinin olduğunu deyən Azad İstehlakçılar Birliyinin sədri qeyd etdi ki, gərək əhaliyə hansı tarixdən hansı tarixə qədər olan partiya dondurmaların zərərli olduğunu bildirəydilər:

"Bir müəssənin istehsal etdiyi malın hamısı xarabdır anlayışı doğru deyil. Təhlükəli mal anlayışı müəyyən bir partya mala aid olan anlayışdır. Həmin partiya satışdan yığışdırılmalı idi. Çox təəssüf ki, bu məlumat verilmədiyinə görə, bazarda xaos əmələ gəlib. Ölkədə 20-dən çox dondurma istehsal edən şirkət var. Dondurma istehsalı sahəsi ölkənin ən çirkli sahələrindən biridir".

İqtisadiyyat Nazirliyi tərəfindən istehlak bazarının qorunması məqsədilə aparılan tədbirlər çərçivəsində müxtəlif ticarət obyektlərində satışda olan ərzaq məhsullarının ilkin laborator müayinəsi zamanı bir sıra dondurmaların tərkibində insanların həyat və sağlamlığı üçün təhlükə yaradan mikroorqanizmlərin normativ sənədlərlə yol verilən miqdardan artıq olduğu müəyyən edilmişdir.

Mövcud pozuntuların daha çox istehsal mənşəli olduğu nəzərə alınaraq, qanunvericiliyin tələblərinə uyğun olaraq, İqtisadiyyat və Səhiyyə nazirliklərinin nümayəndələri tərəfindən dondurma istehsal edən bir sıra sahibkarlıq subyektlərində birgə nəzarət tədbirləri həyata keçirilmiş və həmin müəssisələrdə istehsal edilən və satış üçün nəzərdə tutulan məhsulların müayinəsi üçün müəyyən olunmuş qaydada nümunələr götürülmüşdür.

Götürülmüş nümunələrin laborator müayinəsi nəticəsində:

-“AER Company Qrup” MMC-nin istehsal etdiyi“Çudo” şokoladlı, “AER” plombir şokoladlı, “AER” plombir vanilli, “Yasif” plombir və “Melisa”;

-“Band Milk” MMC-nin istehsal etdiyi “Nostalji” plombir, “Briket-krem brule” və vafli stəkanda olan qaymaqlı-şokoladlı;

-fiziki şəxs Sərngül Yusubovanın istehsal etdiyi “Bakinskiy privet” plombir, “Meqapolis” şokoladlı plombir, “Cappuçino” qəhvəyi, “Matryoşka” plombir, “Selena” şokoladlı plombir, “Panda” südlü, “Meçta” şokoladlı plombir, “Arktika” şokoladlı plombir, “Tanqo” şokoladlı və “Tanqo” cemli;

-fiziki şəxs Müzəffər Poladovun istehsal etdiyi “Mono Quality” badamlı, “Bakı gecələri” plombir, “Armada”, “Eskimo Yoloçka”, “Yeni şəhər” plombir;

-“S.A.B.A. Şirkəti” MMC-nin istehsal etdiyi “İçəri şəhər” qəhvəyi, “İçəri şəhər” qəhvəli, “Pristij” çiyələkli, “Pristij” qozlu, “Əsl” plombir;

-“A.Y.S-60” MMC-nin istehsal etdiyi “Südlü” klassik və “A-klass” dondurmalarında bağırsaq çöpləri qrupundan olan bakteriyaların (koliformlar) miqdarının normativ sənədlərdə nəzərdə tutulmuş miqdardan artıq olduğu müəyyən edilmişdir.

Eyni zamanda götürülmüş nümunələrin laborator müayinəsi nəticəsində “AER Company Qrup” MMC-yə məxsus “Çudo” şokoladlı, “AER” plombir şokoladlı və “AER” plombir vanilli, habelə fiziki şəxs Sərngül Yusubovaya məxsus “Bakinskiy privet” plombir, “Meqapolis” şokoladlı plombir, “Cappuçino” qəhvəyi, “Matryoşka” plombir, “Selena” şokoladlı plombir və “Panda” südlü dondurmalarında mezofil-aerob ve fakultativ-anaerob mikroorqanizmlərin də miqdarının normativ sənədlərlə müəyyən olunmuş normativdən artıq olduğu aşkar edilmişdir.

Aşkar olunmuş qanun pozuntuları ilə əlaqədar “AER Company Qrup” MMC,“Band Milk” MMC, “S.A.B.A. Şirkəti” MMC, “A.Y.S-60” MMC, habelə fərdi sahibkarlar Müzəffər Poladov və Sərngül Yusubova barədə qeyd olunan dondurmaların istehsalının dayandırılması, bu məhsulların ticarət şəbəkəsindən geri çağırılması kimi məhdudlaşdırıcı tədbirlər tətbiq edilmiş və istehsalat sahəsində müvafiq sanitariya-gigiyenik və dezinfeksiya tədbirlərinin həyata keçirilməsi barədə göstəriş verilmişdir.

İstehlak bazarında birgə nəzarət tədbirləri davam etdirilir.

İqtisadiyyat və Səhiyyə nazirlikləri bir daha sahibkarlıq subyektlərinə ərzaq məhsullarının istehsalı prosesində normativ texniki tələblərə, sanitariya norma və qaydalarına ciddi əməl edilməsini, məhsulların keyfiyyət və təhlükəsizlik tələblərinə uyğun olmasını təmin etməyi tövsiyə edir.

Qanunvericiliyin tələblərinə əməl etməyən sahibkarlıq subyektləri barəsində ciddi məsuliyyət tədbirləri görüləcəkdir.

Səxavət Məmməd
Ölkə.Az