Səudiyyə Ərəbistanından yeni qərar

Səudiyyə Ərəbistanı Qırmızı dəniz sahillərində vizasız səyahətin mümkün olacağı 50 adada yarı müstəqil istirahət müəssisəsələri qurmağı planlaşdırır.

"Ölkə.Az" xəbər verir ki, istirahət zonalarında geyim qadağası ləğv ediləcək.

Səudiyyənin dövlət sərmayə fondundan bildirilir ki, yarı müstəqil zonalar beynəlxalq standartlara uyğun qanunlarla idarə ediləcək. Şahzadə Məhəmməd bin Səlmanın rəhbərlik etdiyi "Vizyon 2030" adlı plan çərçivəsindəki layihə ölkənin sahil zonasında təqribən 200 km-lik ərazidə inşa ediləcək.

Dünya bazarlarında neft qiymətləri aşağı düşdüyü üçün Səudiyyə Ərəbistanı iqtisadiyyatı dirçəltmək üçün müxtəlif üsullara əl atır. Bu layihənin məqsədi isə həm xarici, həm də yerli turistləri istirahət zonalarına cəlb etməkdir.

Layihədə suya akvalanqla dalmaq, paraşütlə tullanmaq və qayalara dırmaşmaq servisləri də olacaq.

"Bloomberg"in xəbərinə əsasən adalara səfər etmək istəyən turistlər Səudiyyə Ərəbistanı vizası almayacaqlar. Eyni zamanda layihə ölkə iqtisadiyyatına ildə 4 milyard dollar gəlir gətirəcək və 35 min yeni iş yeri açılacaq. İnşaat 2019-cu ildə başlayacaq və 2022-ci ildə başa çatacaq.

Hikmət Həsənov
Ölkə.Az