Osvensiumun 96 yaşlı mühasibi ömrünün qalan hissəsini həbsdə keçirəcək
Hannover prokuroru 96 yaşlı Oskar Qreninqin həbsxana üçün sağlam olduğunu bəyan edib.
"Ölkə.Az" xəbər verir ki, Osvensiumun mühasibi ömrünün qalan hissəsini dəmir barmaqlıqlar arxasında keçirəcək.
Qreninqin vəkilləri cəzanın ləğvi üçün müraciət etsələr də, onlara rədd cavabı verilib. Tibbi müayinədən sonra məlum olub ki, Qreninq cəzasını həbsxanada çəkə bilər. Amma keçmiş nasistin hansı müddətə həbs ediləcəyi və hansı həbsxanaya yola salınacağı barədə məlumat yoxdur. Bu barədə qərar qəbul ediləcək.
2015-ci ilin iyul ayında Qreninq Osvensium düşərgəsində 300 min insanın ölümündə iştirak etdiyi üçün 4 il azadlıqdan məhrum edilib.
Qeyd edək ki,Qreninq əsir düşərgəsinin mühasibi işləyib və dustaqlardan yığılan valyutanın qəbul edilməsi ilə məşğul olub. Prosesdə keçmiş mühasib günahkar olduğunu etiraf edib.
Hikmət Həsənov
Ölkə.Az
