İranda bardaş qurma və ya stul demokratiyası

"Ölkə.Az" xəbər verir ki, Ruhani təşkil edilən rəsmi tədbirlə prezident səlahiyyətlərinin icrasına başlayıb. Rəsmi tədbirdə Həsən Ruhani yerdə bardaş qurub otursa da, İranın dini lideri Ayətullah Əli Xamenei yüksək bir stulda əyləşib.

Tədbirdə daxili işlər naziri Rəhmani Fəzli prezident seçkilərinə dair hesabatı təqdim edib. Nazir qeyd edib ki, bölgədə baş verən problemlərə rəğmən İranda qanunlara uyğun şəkildə seçkilər həyata keçirilib.

Daxili işlər nazirinin hesabatından sonra Xameneinin xüsusi işlər üzrə müdiri Məhəmməd Gülpayegani Ruhaninin prezidentliyinin təsdiq edilməsi mətnini oxuyub. Beləcə, Xamenei İran xalqının səsini təsdiq edərək Həsən Ruhanini 4 il müddətinə prezident təyin etdi.

Prezident çıxışında mülayim siyasətin ölkənin inkişafına ciddi təsir edəcəyini bildirib. Dünya ölkələri və xüsusilə də qonşu ölkələrlə xoş münasibət və əməkdaşlığın iqtisadi inkişafa təsirini qeyd edən Ruhani seçkilərdən də razı qaldığını bildirib.

Sonra isə dini lider çıxış edib. Xamenei seçkilərin vacibliyini vurğulayaraq Ruhani hökumətinin növbəti 4 il ərzində iqtisadi problemlərə əhəmiyyət verməsinin vacibliyini söyləyib. Daxili və regional problemlərə toxunan Xamenei idarəçilərin tənqidə açıq olmalarının vacibliyini bildirib və Ruhaniyə uğurlar diləyib.

Hikmət Həsənov
Ölkə.Az