Pekin hərəkətə keçdi
OPEC-in neft hasilatı kvotasını əvvəlki səviyyədə saxlamaq qərarı fonunda Çin Xalq Respublikası (ÇXR) hökuməti aktiv olaraq ucuzlaşmış neft almağa başlayıb.
Ölkənin strateji ehtiyatını artırmaq üçün əla fürsət yarandığını bildirən Nomura Holdings Inc kompaniyasının analitiki Qordon Kvan Çinin OPEC-in qərarından böyük xeyir götürəcəyinə əminliyini ifadə edib. SCI International kompaniyasının eksperti Qao Tszyan isə neftin qiymətinin ucuzlaşmasının strateji ehtiyatların formalaşdırılması üzrə milli proqramın inkişafına səbəb olacağını deyir.
Bu ilin ilk doqquz ayı ərzində keçən ilin analoji dövrü ilə müqayisədə Çin neft idxalını 8,3 faiz – təxminən sutkada 460 min barrel artırıb. Yeni anbarların istifadəyə verilməsi ilə bu göstərici sutkada 700 min barrelə qədər artırıla bilər.
ÇXR dövlət statistika idarəsinin məlumatına görə, noyabr ayında bu ölkənin milli strateji neft ehtiyatının 12,5 milyon tonluq (93,5 milyon barrel) ilk mərhələsinin doldurulması başa çatıb. 2020-ci ilə qədər Çinin strateji neft ehtiyatlarının həcminin 40 milyon tona (299 milyon barrel) çatacağı güman edilir. (AzərTAc)
Ölkə.Az
