Səudiyyənin itkin düşən şahzadələri

"Ölkə.Az" xəbər verir ki, Səudiyyə hökumətini tənqid edən şahzadələrin qaçırılaraq təyyarə ilə Səudiyyə Ərəbistanına aparıldığına dair faktlar üzə çıxıb. Şahzadələrin sonrakı taleyi barədə məlumat yoxdur.

1932-ci ildən bu yana Səudiyyə Ərəbistanında mütləq monarxiya hökm sürür. Ölkədə müxalifətə münasibət də pisdir.

Bir müddət Səudiyyə polisində yüksək vəzifə tutan şahzadə Turki bin Bandar bir miras anlaşılmazlığı səbəbindən həbsə atılmışdı. Həbsxanadan çıxan şahzadə Parisə qaçır və 2012-c ildən Səudiyyədə reform çağırışları edən video çarxlar yayımlayır. Səudiyyə şahzadəni geri çağırsa da, Turki bu təklifi rədd edib. Eyni zamanda şahzadə daxili işlər nazirinin müavini ilə arasında baş tutan telefon danışığını da sosial şəbəkədə paylaşıb. Nazir müavini şahzadəyə onu ölkədə gözlədiklərini, ona heç kəsin toxunmayacağını bildirir. Şahzadə isə "Səni Sultan Bin Turki kimi geri qaytaracağıq" hədəli məktublar aldığını, bu məktubların isə nazirlikdən göndərildiyini bildirir.

Şahzadə Turki bin Bandar 2015-ci ilin iyul ayından yoxa çıxıb. Sultan Bin Turki də 2016-cı ildə Parisdən Qahirəyə uçmaq istəsə də, təyyarə Riyadda hava limanına enib.

Turki itkin düşəndən sonra Mərakeş mətbuatı müxalif şahzadənin Mərakeşdən Parisə uçmağa hazırlaşdığı ərəfədə həbs edildiyini, Səudiyyənin tələbi ilə məhkəməyə çıxarıldığını, sonra isə ölkədən qovulduğunu yazır.

Turki bin Bandarın başına gəldiyi bilinmir, amma dostuna bu məktubu yazdığı məlumdur: "Sevimli dostum, bu yazdıqlarım itkin düşəcəyim və ya sui-qəsd qurbanı olacağım halda paylaşılsın. Qaçırılacağımı və ya məni öldürəcəklərini bilirəm. Mənim və Səudiyyə xalqının haqlarını necə talan etdiklərini başa düşürəm".

Eyni dövrdə Avropa qumarxanaları və bahalı otellərinin müştərisi şahzadə Suud bin Saif əl-Nasr da yoxa çıxır. 2014-cü ildən bu şahzadə Tvitter səhifəsində krallığı tənqid edirdi.

Saif Misir prezidenti Mursinin taxtdan salınmasını dəstəkləyən Səudiyyə rəsmilərinin məhkəmədə cavab verməli olduğunu yazırdı. 2015-ci ilin sentyabr ayında Saif adı açıqlanmayan bir Səudiyyə şahzadəsinin Kral Salmanı devirmək üçün göndərdiyi çağırış məktubuna dəstək verdi: "Millətimi bu məktubların məzmununu təzyiq vasitəsinə çevirməyə çağırıram".

2013-cü ildə Almaniyaya qaçaraq sığınma tələb edən digər müxalif şahzadə Xalid bin Fərhan isə bin Saif əl-Nasrın iş görüşü bəhanəsi ilə Milandan Romaya uçmağa inandırıldığını bildirir: "Özəl bir təyyarə onu Milandan Romaya apardı. Amma təyarə Romaya yox, Riyada endi. Bu işi Səudiyyə kəşfiyyatı edib. Onu hazırda yeraltı həbsxana gözləyir".

Xalid sözlərinə əlavə edib: "Kral ailəsindən Avropada 4 nəfər yaşayırdı. Biz kral ailəsini və Səudiyyədəki iqtidarı tənqid edirdik. Üç nəfər qaçırılıb. Tək mən qalmışam. Amma mən çox tədbirliyəm. Qaçıra bilsəydilər, bu günə qədər qaçırardılar".

Səudiyyə Ərəbistanı hökuməti isə iddialara cavab vermir.

Hikmət Həsənov
Ölkə.Az