Qurban Qurbanov "Kimlərsə fikirləşə bilər ki, "Valletta" bizim üçün asan rəqibdir"

Bu axşam Çempionlar Liqasının II təsnifat mərhələsinin ilk görüşü çərçivəsində Maltada "Valletta"nın qonağı olacaq "Qarabağ" klubunun baş məşqçisi Qurban Qurbanov oyunöncəsi keçirilən məşqdən sonra qarşıdakı matç haqda fikirlərini bölüşüb.

Olke.az-ın məlumatına görə, klubun rəsmi saytına danışan Q.Qurbanov "Valletta"nın asan rəqib olmadığını bildirib: 

"Rəqibimiz ötən mövsümün sonundan etibarən heyətində xeyli dəyişikliklər edib. Komandaya yaxşı oyunçular cəlb edilib, yerli və gənc məşqçi vəzifəyə gətirilib. Klubun prezidenti özü açıqlama verib ki, daha yaxşı komanda təşkil etmək istəyir. Gördüyü işlər, etdikləri transferlər də bu istəyi əks etdirir. Yeni gələn oyunçular Malta milli komandasından, Avstraliyadan, Portuqaliyadan, Yunanıstan liqasından transfer olunan futbolçulardır. Hər biri keyfiyyətli oyunçulardır. 

Ötən il Avropa Liqasında yaxşı təcrübə qazanmış bir komandadır. Kimlərsə fikirləşə bilər ki, "Valletta" bizim üçün asan rəqibdir. Lakin düşünürəm ki, bu səhv fikirdir. Çünki, rəqibimizin çox təcrübəli, nəticəyə oynaya biləcək futbolçuları çoxdur. Xüsusi ilə orta xətti vurğulamaq istəyirəm. Ayrıca, baş məşqçilərinin də yeni olmasını nəzərə alıb, ilk dəqiqələrdən rəqibin oyun üslubunu müəyyən etməyə və qapımızı toxunulmaz saxlamağa çalışacağıq. Həmçinin oyuna nəzarəti də ələ almalıyıq".

42 yaşlı mütəxəssis bu görüşdə qeydə alınacaq minimal hesablı qələbə və ya bərabərliyin onlar üçün pis nəticə olmayacağını deyib. 

Qeyd edək ki, "Valletta" - "Qarabağ" oyunu bu axşam, Bakı vaxtı ilə saat 21:30-da başlayacaq.

Olke.az