Reks Tillerson Rusiyanı ittiham etdi

"Ölkə.Az" xəbər verir ki, Tillerson Rusiyanı Taliban qruplaşmasını silahlandırmaqda ittiham edib.

ABŞ diplomatı deyib: "Rusiya Talibanı silahla təmin edir. Bu isə BMT-nin Təhlükəsizlik Şurasının qətnamələrini və beynəlxalq hüququ pozmaq deməkdir. Biz təbii ki, bunun əleyhinə çıxırıq və Rusiyanı bu məsələyə diqqət ayırmağa çağırırıq".

Onun sözlərinə görə silah göndərilməsi Əfqanıstan hökuməti ilə razılaşdırılmalıdır: "Əgər kimsə silah göndərmək niyyətindədirsə, bunu ancaq Əfqanıstan hökuməti ilə razılaşdırmalıdır".

Aprel ayında Əfqanıstandakı ABŞ ordusunun komandanı Con Nikolson Pentaqonun taliblərə Rusiyadan silah göndərildiyi barədə məlumat əldə etdiyini bəyan etmişdi. Mart ayında isə ABŞ ordusunun generalı və NATO-nun Avropadakı birləşmiş ordu komandanı Kertis Skaparotti Rusiyanın Taliban ilə əlaqələrini genişləndirdiyini bildirmişdi.

Rusiya tərəfi isə bu ittihamları dəfələrlə yalanlayıb.

Hikmət Həsənov
Ölkə.Az